Deputeti dhe ish-komandanti i Ushtrisë Çlirimtare të Kosovës, Fatmir Limaj, i cili është tashmë në gjyq për krime lufte, është marrë në pyetje nga prokurorët në Prishtinë në lidhje me një tjetër çështje të kohës së luftës.
Ish-komandanti i UÇK-së Fatmir Limaj, i cili tani drejton Nismën për Kosovën pjesë e opozitë, konfirmoi të enjten në mbrëmje se ai ka dhënë një deklaratë Prokurorisë Speciale të Kosovës në lidhje me një krim që dyshohet se ndodhi gjatë luftës së Kosovës në vitet 1990.
“Shpresoj që me deklaratën time, puna ime në këtë çështje të ketë përfunduar,” tha Limaj për mediat lokale.
Prokuroria speciale nuk dha ndonjë hollësi në lidhje me çështjen dhe nuk sqaroi nëse Limaj u mor në pyetje si dëshmitar apo si i dyshuar, duke thënë se hetimi është në vazhdim e sipër dhe se çdo deklara5të “mund të rrezikojë procesin”.
Limaj tha se shpresonte që deklarata e tij do ta ndihmonte prokurorinë të sqaronte këtë çështje, sepse “për 16 vjet me radhë thashethemet dhe shpifjet kanë lënduar familjet e viktimave më shumë sesa vdekjet e të afërmve të tyre”.
Gjatë luftës, Limaj ishte komandant i shquar i UÇK-së në të ashtuquajturën zonë operative të Pashtrikut, duke luftuar në vitin 1998 dhe 1999 kundër forcave serbe dhe për pavarësinë e Kosovës.
Komandant “Çeliku”, siç ai njihej gjatë konfliktit, është përballur me akuza të shumta për krime lufte në këto 17 vjet që ka mbaruar lufta, por deri më tani nuk është dënuar kurrë për ndonjë të tillë.
Ai ka mohuar gjithmonë ndonjë lidhje me krimet e luftës.
Në vitin 2003, Gjykata e Hagës e akuzuar Limaj për krime kundër njerëzimit dhe krime lufte që dyshohet se janë kryer në vitin 1998 në kampin e paraburgimit të UÇK-së në Llapushnik, në komunën e Gllogocit.
Për shkak se nuk kishte burgje të vërteta, UÇK-ja përdori gjerësisht qendra të mëdha të improvizuara ku ata mbanin jo vetëm civilët serbë, por edhe shqiptarë të Kosovës që besohej se i bënin rezistencë luftës së tyre guerile.
Prokuroria e Hagës pretendoi se Limaj “ushtroi komandë dhe kontroll de juro dhe de facto mbi anëtarët e UÇK-së që vepronin në kampin e burgimit në Llapushnik” dhe tha se ai duhet të mbahet përgjegjës për krimet e kryera atje, përfshirë vrasjen e më shumë se 30 personave.
Në vitin 2007 ai u lirua nga akuzat për mungesë provash.
Në mars të vitit 2011, ai dhe tetë të tjerë u arrestuan nga misioni i sundimit të ligjit të BE-së në Kosovë, EULEX-i, nën dyshimin se ishin të përfshirë në vrasjen dhe torturimin e të burgosurve në kampin Kleçka gjatë luftës.
Aktakuza pretendoi se Limaj dhe të tjerët “dhunuan integritetin trupor dhe shëndetin e një numri të paspecifikuar civilësh serb dhe shqiptarë të burgosur lufte” të cilët mbaheshin të burgosur në burgun e improvizuar në Kleçkë.
Ai u lirua nga akuzat, por çështja tani ka kaluar në apel.
Limaj po hetohet gjithashtu në Serbi, ku prokurorët e krimeve të luftës dyshojnë se ai ishte një nga 28 luftëtarët nga Brigadës 121 e UÇK-së të përfshirë në vrasjen e 22 serbëve dhe shqiptarëve në fshatrat e Lipjanit, Shtimes dhe Drenasit të Kosovës në vitin 1998.
Disa nga këto krime priten gjithashtu të gjykohen në Gjykatën e re Speciale për krimet e luftës në Kosovë, e cila pritet të fillojë punë nga fundi i vitit.
Gjykata, e cila zyrtarisht quhet Dhomat e Specializuara dhe Prokuroria e Specializuar për Kosovën, do të ndjekë penalisht krimet e dyshuara të kryera nga luftëtarët e UÇK-së, gjatë dhe pas luftës në Kosovë nga viti 1998-2000.
Ajo do të veprojë sipas ligjeve të Kosovës, por të jetë e bazuar në Hagë, pasi komuniteti ndërkombëtar ka vendosur që sistemi gjyqësor i Kosovës nuk është i aftë të trajtojë çështje të ndjeshme krimesh lufte.
