Policia bullgare ka kapur 55 emigrantë dhe dhjetë të dyshuar si trafikantë në një operacion të shkallës së gjerë kundër migracionit të paligjshëm të kryer të premten.
Policia bullgare ka arrestuar 33 persona në një operacion në 24 orët e fundit, ndërsa vazhdon aksioni në 11 qytete dhe në zonat kufitare me Turqinë dhe Serbinë, lajmëroi të premten Ministria e Brendshme.
Mbi 1400 zyrtarë janë përfshirë në kontrolle në hostele, restorante, dyqane, automjete dhe vende të tjera në të gjithë vendin.
“Kjo është një pjesë e qasjes sonë për menaxhimin e presionit të migrimit – jo vetëm për mbrojtjen e kufirit, por edhe për kontroll e regjistrim të emigrantëve të paligjshëm brenda vendit”, tha ministrja e brendshme Rumjana Bachvarova për televizionin kombëtar.
Ajo shtoi se ky ishte një operacion rutinë dhe nga ata që kryhen rregullisht, “kur është e nevojshme”.
Aksioni më i madh kundër migrimit ilegal deri më tani është bërë në nëntor të vitit 2015, kur policia arrestoi 320 persona pas bastisjeve nëpër të gjithë vendin.
Bullgaria ka zbatuar masa të ashpra për të ndaluar emigracionin e paligjshëm, përfshirë lejimin e ushtrisë në patrullimin e kufirit.
Që nga viti 2014, autoritetet kanë ndërtuar një gardh 132 kilometra të gjatë përgjatë kufirit me Turqinë, që ende nuk është përfunduar.
Ndërtimi i të ashtuquajturit “objekt i përkohshëm i parandalimit” është kritikuar nga grupet e të drejtave të njeriut dhe nga opozita në Bullgari.
Një nga ankesat lidhet me vazhdimin e punimeve për një kohë të gjatë dhe shpenzimi i disa
milionë leva nga buxheti.
Të premten, qeveria njoftoi se ka dhënë 6,2 milion leva (rreth 3.1 milion euro) të tjera për gardhin në zonën rreth qytetit juglindor të Burgas.
Në fund të janarit, 34 milionë leva (rreth 17 milionë euro) të tjera janë shtuar për atë që ishte planifikuar fillimisht të kushtonte 30 milionë leva (rreth 15 milionë euro).
Policia tha se të premten janë ngritur akuza kundër një personi me të kaluar kriminale, i arrestuar me një grup prej 25 emigrantësh, të gjithë nga Pakistani dhe Afganistani, përfshirë edhe tre fëmijë.
Ata u kapën në një shtëpi fshati afër Dimovos, një qytet në afërsi të kufirit verilindor të Bullgarisë me Serbinë, ndërsa dyshohet se po prisnin kontrabandistët që t’i transferonin përtej kufirit.
Dymbëdhjetë prej migrantëve kishin dokumente nga Agjencia Shtetërore Bullgare për Refugjatët, që do të thotë se kishin aplikuar për azil në Bullgari, por vendosën të vazhdonin rrugën për në Europën Perëndimore.
Bullgaria do të mund t’i dërgojë përsëri emigrantët që kanë kaluar kufirin e saj me Turqinë në mënyrë të paligjshme nga 1 qershori, në bazë të protokollit të nënshkruar mes Sofjes dhe Ankarasë më 5 maj.