Pas dy dekadash procese gjyqësore, anëtarët e organizatës famëkeqe janë shpallur të pafajshëm për listën e gjatë të krimeve të përgjakshme të ndodhura në mesin e viteve ’90.
Gjykata e Apelit të Krimeve të Rënda rrëzoi akuzat për një serial të gjatë krimesh të përgjakshme të ndodhura në mesin e viteve ’90 dhe u dha pafajësinë dhjetë anëtarëve të organizatës “Hakmarrja për Drejtësi”.
Përmes vendimit të saj të shpallur të hënën, pesë gjyqtarët e Apelit të Krimeve të Rënda vendosën të rrëzojnë dy dënimet me burgim të përjetshëm për të akuzuarit si drejtues të organizatës, Orik Shyti dhe Altin Arapi dhe mbi 170 vjet të tjera burg për tetë anëtarët e tjerë të “Hakmarrjes për Drejtësi”.
Vendimi i pafajësisë së pesëshes së gjyqtarëve të kryesuar nga Alaudin Malaj, të cilët u deleguan nga Këshilli i Lartë i Drejtësisë për të dhënë një vendim për organizatës famëkeqe u bazua në faktin se provat që inkriminojnë të akuzuarit janë marrë në mënyrë të kundraligjshme nga policia.
Gjykata e Apelit të Krimeve të Rënda e pati gjykuar njëherë organizatën “Hakmarrja për Drejtësi” dhe në korrik të vitit 2009 vendosi dënime të rënda për anëtarët e saj, mes të cilave edhe dy dënime me burgim të përjetshëm. Por vendimi i formës së prerë u rrëzua nga një Kolegj Penal i Gjykatës së Lartë më 9 mars të vitit 2016, duke i lënë një shteg të hapur rigjykimit të saj.
Sipas vendimit të Gjykatës së Lartë, “Apeli kishte gabuar në zbatimin e ligjit proceduarial dhe atij material dhe duhet të riçelë hetimin gjyqësor”.
“…nga ky Kolegj janë konstatuar se në fazën e hetimit paraprak janë lejuar shkelje të rënda proceduriale, të cilat kanë sjellë si rezultat pavlefshmëri ose papërdorshmëri të akteve proceduriale….ato duhet të përjashtohen si prova kundër të gjykuarve,” thekson më tej vendimi i Kolegjit Penal të Gjykatës së Lartë.
Organizata “Hakmarrja për Drejtësi” është gjykuar për dy dekada në të gjitha shkallët e sistemit gjyqësor në Shqipëri për vepra penale të quajtura “akte terroriste”, për disa grabitje të armatosura, për vendosjen e një bombe te ish-marketi i VEFA-s në Tiranë, vrasjen e ish-drejtorit të Burgjeve si dhe rrëmbimin e një fëmije.
Anëtarët e kësaj organizate, tre prej të cilëve kanë përfituar azil politik jashtë Shqipërisë i kanë mohuar vazhdimisht akuzat, por vendimet e gjykatave konfirmuan dënimet e ashpra për ta, të cilat u bënë nul nga vendimi i Gjykatës së Apelit për Krime të Rënda.
