Leku shqiptar humbi 1.9% të premten kundrejt euros, një nga lëvizjet më të forta në shumë vite, por marzhet e zgjeruara të agjencive të këmbimit valutor sugjerojnë se tregu nuk është ende i bindur për drejtimin e kursit në ditët e ardhshme.
Monedha e përbashkët europiane, Euro, u shkëmbye në tregun shqiptar për 127.6 lekë sipas kursit mesatar fiks të publikuar nga Banka e Shqipqërisë, me një rënie prej 2.33 lekësh në krahasim me të enjten, një nga ndryshimet më të forta në tregun shqiptar të këmbimit valutor në shumë vite. Rënia e fortë e lekut pason deklaratën e Bankës së Shqipërisë të së mërkurës, e cila paralajmëroi për ndërhyrje në treg për blerjen e euros së tepërt si dhe për faktin se ndërhyrja do të vijojë “për aq kohë sa të jetë e nevojshme”.
Të dhënat historike të Bankës së Shqipërisë mbi kursin e këmbimit, tregojnë se rënia e kursit të euros me 2.33 lekë brenda një dite nuk ka ndodhur kurrë përgjatë periudhës nga viti 2008 deri më sot. Ndryshimi tjetër me përmasa të ngjashme është shënuar më 7 dhjetor 2011 kur euro u forcua me 2.2 lekë brenda ditës.
Agjencitë e këmbimit valutor zgjeruan marzhet e fitimit të tyre bruto në deri 2 apo 3 lekë, një gjë e pazakontë në tregun shqiptar ku konkurrenca e fortë nga numri i lartë i agjencive të këmbimit valutor ofron shërbime të tilla përkundrejt marzheve që shpesh janë më pak se 0.5 lekë në diferencën nga çmimi i blerjes në atë të shitjes.
Pasiguria në treg është e madhe veçanërisht për shkak se ndonëse BSH ka deklaruar ndërhyrjen e saj, përmasat e ndërhyrjes janë të panjohura. Në ndërhyrjet e veta të zakonshme, BSH blen afërsisht një herë në muaj 3 deri në 6 milionë euro, por në ndërhyrjet e jashtëzakonshme, shumat e blera nuk dihen. Është gjithashtu e paqartë se sa prej nënçmimit të lekut është shkaktuar nga ndërhyrja fizike e BSH në treg dhe sa është shkaktuar nga efekti psikologjik i krijuar nga deklarata e BSH për ndërhyrje.
