Maqedonia ka nisur punën për përgatitjet për plebishitin e ardhshëm për marrëveshjen e emrit me Greqinë, një mundësi historike që vendi të zhbllokojë kërkesat e tij për pranim në BE dhe NATO.
Nëse përgatitjet shkojnë sipas planit, data më e afërt e mundshme për referendumin e rëndësishëm për emrin e Maqedonisë do të jetë më 16 shtator ose ndoshta më 23 shtator, tha për BINR në kushte anonimiteti një burim i mirëformuar nga Social Demokratët në pushtet.
“Ne do të ngutemi për një datë sa më herët që është e mundur në mënyrë që nëse referendumi e aprovon marrëveshjen e emrit, parlamenti do të ketë kohë të mjaftueshme për ta vënë në zbatim marrëveshjen në fund të vitit siç është planifikuar,” tha burimi.
Partitë politike në fillim duhet të emërojnë anëtarë të rinj në Komisionin Zgjedhor Shtetëror, i cili do të mbajë referendumin në vjeshtë.
Më pas palët do të duhet të zgjidhin pyetjen e saktë të referendumit dhe të bien dakord për datën e saktë.
Burimi i Social Demokratëve tha se partitë në pushtet tashmë kanë paraqitur propozimet e tyre për anëtarët e rinj të Komisionit Zgjedhor Shtetëror.
Nëse opozita, nga radhët e të cilës duhet të vijë kreu i komisionit, bën të njëjtën gjë së shpejti, burimi pret që një seancë parlamentare që do të caktojë anëtarët e komisionit të lihet deri në fund të kësaj jave.
Kryeministri maqedonas Zoran Zaev tha për mediat të martën se ai pret që kjo të ndodhë së shpejti.
Zaev tha se detajet e sakta mbi referendumin do të dakordohen pas samitit të 11-12 korrikut të NATO-s, në të cilin vendi pret të marrë një ftesë për t’iu bashkuar aleancës.
“Menjëherë pas kësaj ne do të hapim debatin, ndoshta do të përcaktojmë datën e referendumit, pyetjen e referendumit dhe llojin e referendumit (konsultativ apo detyrues),” tha Zaev.
Sipas marrëveshjes historike të nënshkruar nga ministrat e jashtëm maqedonas dhe grekë më 17 qershor, Maqedonia do të ndryshojë emrin e saj në Republika e Maqedonisë së Veriut në këmbim të perspektivës për një hyrje të shpejtë në NATO dhe fillimin e bisedimeve të pranimit në BE.
Që ajo të zbatohet plotësisht, marrëveshja duhet të mbështetet nga një shumicë votash në Maqedoni në një referendum të planifikuar për në fillim të shtatorit ose në fund të tetorit.
Kjo do të thotë se një minimum prej 900,000 njerëzish do të duhet të shkojnë dhe të votojnë dhe më shumë se gjysma e tyre do të duhet ta mbështesin marrëveshjen.
Deri më tani, partia e djathtë opozitare VMRO DPMNE, e cila kundërshton marrëveshjen me Greqinë, duke e përshkruar atë si tradhti, tha se do të këmbëngulë për një referendum të detyrueshëm.
Edhe partia e Zaevit tha gjithashtu se pavarësisht llojit të plebishit, rezultati i tij do të respektohet nga qeveria.
Duke iu përgjigjur çështjes së pyetjes së mundshme të referendumit, Zaev tha se ajo do t’i drejtohet patjetër marrëveshjes me Greqinë, si dhe perspektivës së vendit për t’u bashkuar me NATO-n dhe BE-në.
