Duke vazhduar Procesin e Berlinit, liderët europianë dhe ata ballkanas do të takohen në Londër të hënën për të diskutuar mënyrat për të përmirësuar zhvillimin në rajon, për të forcuar sigurinë dhe për të arritur pajtim.
Samiti i pestë i Ballkanit Perëndimor fillon të hënën në Londër me vendet kryesore anëtare të BE-së dhe liderët e Mbretërisë së Bashkuar që takojnë krerët e gjashtë qeverive ballkanike për “forcimin e axhendës së reformave në rajon” në mënyrë që ata të mund të përmbushin kriteret për pranimin në BE.
Fokusi është në ato vende të Ballkanit që nuk janë ende anëtarë të BE-së: Shqipëria, Bosnja dhe Hercegovina, Kosova, Maqedonia, Mali i Zi dhe Serbia, dhe siguria dhe ekonomia do të jenë në krye të axhendës së samitit të këtij viti.
Samiti po mbahet në kuadër të procesit të Berlinit, i cili u iniciua nga kancelarja gjermane Angela Merkel për të përmirësuar marrëdhëniet brenda rajonit dhe për të përshpejtuar integrimin në BE të atyre shteteve që nuk janë ende anëtare.
Procesi i Berlinit, i cili filloi në gusht 2014, është shënuar nga samite të përvitshme të mbajtura për të theksuar përkushtimin e BE-së ndaj Ballkanit Perëndimor. Vitin e kaluar këtë event e organizoi Italia.
Më 4 korrik, ministrat e ekonomisë nga rajoni u takuan në Vjenë, Austri, për të shqyrtuar mënyrën se si Procesi i Berlinit mund të mbështeste më së miri rritjen ekonomike në rajon, duke përfshirë qarkullimin pa pengesa të mallrave, shërbimeve, kapitalit dhe punësimit të kualifikuar si edhe promovimit të investimit dhe tregtisë.
Përveç Ministrave të Brendshëm dhe Ministrave të Jashtëm, takimi i të hënës dhe të martës do të mbledhë edhe liderë, diplomatë dhe ekspertë të financave të BE-së dhe Ballkanit.
Ai mbahet në një sfond pikëpyetjesh serioze mbi të ardhmen e BE-së, pasi Britania vendosi të largohet nga BE-ja dhe ndërsa shtetet anëtare debatojnë keqazi mbi emigracionin.
Edhe pse zyrtarët britanikë këmbëngulin se Britania e Madhe do të mbetet e angazhuar në rajonin e Ballkanit në epokën pas Brexit, disa mendojnë se është paradoksale që Britania, e cila është në proces largimi nga Bashkimi, po organizon një samit që ka lidhje me zgjerimin e BE-së.
Por zyrtarët britanikë thonë se kjo thjesht vërteton pretendimin e tyre se Britania e Madhe është ende e interesuar në rajon.
Sipas njoftimit për shtyp të qeverisë së Mbretërisë së Bashkuar, samiti i këtij viti do të përqendrohet në rritjen e stabilitetit ekonomik me qëllim përmirësimin e mjedisit të biznesit, inkurajimin e sipërmarrjes, trajtimin e papunësisë së të rinjve dhe promovimin e ndërlidhjes rajonale.
Ai gjithashtu do të trajtojë forcimin e bashkëpunimit rajonal të sigurisë për të ndihmuar në trajtimin e kërcënimeve të përbashkëta, përfshirë korrupsionin, krimin e rëndë dhe të organizuar, trafikimin e njerëzve, drogës dhe armëve të zjarrit, terrorizmin dhe ekstremizmin e dhunshëm.
Samiti do të synojë gjithashtu lehtësimin e bashkëpunimit politik – për të ndihmuar në zgjidhjen e mosmarrëveshjeve dypalëshe dhe për të kapërcyer çështjet e trashëgimisë që rrjedhin nga konfliktet e viteve 1990 dhe forcimin e demokracisë dhe barazisë gjinore.
“Roli i Mbretërisë së Bashkuar në mbajtjen e samitit të këtij viti është vetëm një pjesë e angazhimit tonë të vazhdueshëm me Ballkanin Perëndimor.
“Mbretëria e Bashkuar dëshiron një rajon të fortë, të qëndrueshëm dhe të begatë të Ballkanit Perëndimor. Duke organizuar samitin në Londër, ne tregojmë interesimin dhe përfshirjen tonë të vazhdueshme në stabilitetin e rajonit pavarësisht daljes tonë nga BE-ja,” tha qeveria britanike.
