Presidenti rumun Klaus Iohannis të hënën u përul para presionit të qeverisë për të shkarkuar kryeprokuroren e Anti-Korrupsionit, Laura Codruta Kovesi, lufta e të cilës kundër korrupsionit në nivele të larta kishte zemëruar partinë në pushtet.
Presidenti i Rumanisë Klaus Iohannis u përul para presionit të qeverisë dhe nënshkroi një dekret të hënën, duke shkarkuar kryeprokuroren e vendit kundër korrupsionit Laura Codruta Kovesi.
Ajo u shkarkua pas disa muajsh tensionesh politike në rritje midis saj, presidentit dhe qeverisë së udhëhequr nga Social Demokratët.
Largimi i saj erdhi pesë javë pasi një vendim i Gjykatës Kushtetuese e detyroi presidentin ta shkarkonte aytë me kërkesë të Ministrit të Drejtësisë Tudorel Toader.
“Vendimet e Gjykatës Kushtetuese duhet të zbatohen si nga presidenti ashtu edhe nga shumica në parlament,” tha të hënën zëdhënësja e e presidentit Madalina Dobrovoski.
“Por lufta kundër korrupsionit nuk do të ndalet. Cilido qoftë emri i kryeprokurorit të DNA-së (Drejtoria Kombëtare Anti-Korrupsion), ky institucion duhet të sigurohet që lufta kundër korrupsionit të bëhet në nivelin më të lartë të mundshëm,” shtoi Dobrovoski.
Toader i kërkoi presidentit në shkurt të shkarkonte Kovesin si kreun e Drejtorisë Kombëtare Anti-Korrupsionit bazuar në një raport të kabinetit që e akuzonte atë për shfrytëzim pushteti dhe të vartësve të saj.
Iohannis fillimisht nuk pranoi ta shkarkonte atë, sepse ai tha se argumentet e ministrit nuk qëndronin.
Lidershipi i koalicionit të udhëhequr nga socialdemokratët ishte planifikuar të mblidhej të hënën për të vendosur nëse do të fillonte apo jo një procedurë për të pezulluar presidentin nëse ai nuk nënshkruante dekretin për shkarkimin e Kovesit.
Kovesi, 45 vjeçe, shërbeu si kryeprokurore e Rumanisë kundër korrupsionit që nga viti 2013. Më parë, ajo ishte edhe prokurorja më e re dhe prokurorja e përgjithshme e parë femër e Rumanisë, në vitin 2006.
Gjatë mandatit të saj, DNA-ja ndoqi penalisht me qindra punonjës publikë, si dhe zyrtarë publikë, përfshirë ish-kryeministra, ministra dhe deputetë.
Që kur Social Demokratët fituan zgjedhjet e dhjetorit 2016, partia ka nxitur qetësimin e luftës kundër korrupsionit që ka çuar në burg disa nga politikanët.
Kjo shtysë, nga ana tjetër, ka shkaktuar protesta të shumta në rrugë.
Shumë nga mbështetësit e Kovesit e kritikuan Iohannisin në rrjetet sociale të hënën, duke e akuzuar atë se i ishte dorëzuar shumë lehtë partisë në pushtet.
Kovesi ndërkohë u largua nga Drejtoria Anti-Kurrupsion të hënën mes duartrokitjesh nga prokurorët e tjerë.
Ajo u tha gazetarëve në një konferencë për shtyp se do të mbetet prokurore, edhe pse jo në Drejtori. “Episodi i sotëm nuk është një mposhtje,” tha Kovesi në konferencën për shtyp. “Korrupsioni mund të mposhtet,” shtoi ajo.
“Është e zakonshme të vërehet se vullneti politik është të bllokojë drejtësinë dhe hetimet,” tha ajo. “DNA-ja ka dëshmuar se të gjithë janë të barabartë para ligjit dhe askush nuk është aq i fuqishëm sa të mund t'i shpëtojë ligjit.”
Drejtoria Anti-Korrupsion do të drejtohet përkohësisht nga zv/kryeprokurori Marius Iacob.