Kryebashkiakët boshnjakë po planifikojnë të mbajnë një protestë të enjten kundër planeve për të ngritur qendra emigrantësh dhe refugjatësh në komunat e tyre.
Një grup prej rreth 50 këshilltarësh lokalë dhe kryetarësh komunash nga Bosnja veriore thanë se do të protestojnë të enjten në Sarajevë përpara institucioneve shtetërore për ato që ata i quajnë përpjekje të gabuara për të zgjidhur krizën në rritje të emigracionit.
“Ne duam të paralajmërojmë për situatën e vështirë në këtë pjesë të vendit, sidomos në qytetin e Bihacit, për shkak të emigrantëve,” tha për televizionin N1 Suhret Fazliç, kryetari i Bihacit, qyteti më i madh në kantonin Una-Sana në Bosnjën Perëndimore.
“Ne do të jemi 50. Nuk kemi dashur të thërrasim më shumë qytetarë për të marrë pjesë, pasi qëllimi ynë është të shkojmë atje në mënyrë paqësore dhe në mënyrë dinjitoze për të bërë thirrje që problemi të zgjidhet,” shtoi Fazliç.
Fazliç vuri në dukje se i kishte kërkuar Ministrit të Sigurisë të Bosnjës, Dragan Mekiç, dhe Kryetarit të Këshillit të Ministrave, Denis Zvizdiç, që t’i presin, por nuk kanë marrë asnjë përgjigje.
Bosnja Perëndimore është përballur prej muajsh me një numër në rritje të emigrantëve që kërkojnë strehim të përkohshëm këtu, afër kufirit kroat, në rrugën e tyre drejt Europës Perëndimore.
“Deri tani, kemi regjistruar rreth 9,000 emigrantë që kanë hyrë në Bosnjë dhe Hercegovinë. Në këtë moment, rreth 3,000 prej tyre qëndrojnë në vend. Të tjerët janë larguar. Disa prej tyre paraqitën kërkesë për azil. Nuk kemi miratuar azil për asnjërin,” shpjegoi Mektiç të mërkurën.
Ministri pranoi se kishte një problem në Kantonin Una-Sana, por tha se kishte rënë dakord me autoritetet vendore për të krijuar tre qendra të përkohshme pritëse në Bihac, Velika Kladusa dhe Cazin – ndërsa kërkojnë një qendër pritjeje në Bosanski Petrovac.
Megjithatë, Zlatko Hujiç, kryetari i komunës së Bosanski Petrovacit, tha të hënën pas takimit me Mektiçin se nuk ishte arritur asnjë marrëveshje e tillë për ngritjen e një qendre pritëse për emigrantët në komunën e tij.
Ndërkohë, anëtar i presidencës boshnjake Mladen Ivaniç tha të martën se Bosnja nevojitet të sigurojë kufijtë e saj për të parandaluar ardhjen e mëtejshme të emigrantëve.
Ata që kanë hyrë deri më tani duhet të kthehen nga vendi ku kanë ardhur, në përputhje me marrëveshjet e ripranimit, shtoi ai.
“Bosnja nuk mund ta mbështesë politikisht këtë numër emigrantësh. Ata nuk janë të mirëpritur në asnjë mjedis. Kjo nuk ka të bëjë me kombësinë e tyre apo ndonjë gjë të tillë. Njerëzit kanë frikë,” tha Ivaniç.
“Midis emigrantëve që hynë në Bosnje, ne identifikuam rreth 30 njerëz që ishin me interes sigurie për ne. I kemi ndarë këta njerëz. Ata janë nën mbikëqyrje të vazhdueshme në qendrën e emigracionit në Sarajevë,” tha Mektiç.
Ministri i Sigurisë ka njoftuar se së shpejti do të paraqesë një nismë për të ndryshuar ligjin me qëllim që të mundësojë forcat e armatosura të marrin pjesë në kontrollin e kufirit shtetëror.
