Slogane anti-qeveritare u shfaqën në një koncert të Massive Attack të martën në Bukuresht – një tjetër shenjë që tregon sesi festivalet muzikore janë kthyer në vende për protesta kundër partisë në pushtet.
Grupi britanik Massive Attack bëri përshtypje në Bukuresht pas shfaqjes së mesazheve që mbështetin aktivistët anti-korrupsion të Rumanisë në një koncert të martën në mbrëmje në kryeqytet.
Disa nga fjalitë e shfaqura në ekranet gjigante ishin mesazhe politike mbi çështjet globale si emigracioni dhe racizmi.
Por ato përmbanin gjithashtu slogane të përdorura nga protestuesit rumunë kundër korrupsionit, të cilët kanë dalë në rrugë për të denoncuar legjislacionin që ata thonë se kërcënon sundimin e ligjit.
Një fjali e shfaqur në koncert ishte “Natën, si hajdutë” – slogani i përdorur nga protestuesit anti-korrupsion kundër një dekreti qeveritar të miratuar më 31 janar 2017 në një takim të mbajtur natën.
Një tjetër ishte “Korrigjim i buxhetit: Bashkia jep 10 milionë për Katedralen e Popullit” – duke iu referuar një teme të ndjeshme të financimit publik për një katedrale të kushtueshme ortodokse në Bukuresht, e planifikuar të inaugurohet në dhjetor 2018.
Shfaqja e mesazheve në koncert bëri që shumë njerëz në audiencë të fillonin të brohorisnin slogane antiqeveritare.
Koncertet dhe festivalet muzikore janë bërë një mënyrë e zakonshme për rumunët për të shprehur zemërimin kundër qeverisë këtë verë.
Më 8 korrik, në festivalin e plazhit Neversea në Constanta u ndërpre energjia elektrike pasi reperi popullor rumun Grasu XXL e quajti qeverinë “bolshevikë”, duke nxitur disa nga audienca prej 50,000 vetësh të brohorisnin slogane kundër Partisë Social Demokratike në pushtet, PDS.
Gjatë një koncerti rock të Judas Priest të dielën në Bukuresht, publiku gjithashtu brohoriti “F..k PSD!”.
Aktivistët rumunë anti-korrupsion kanë gjetur edhe mënyra të tjera për të përsëritur këtë slogan të veçantë.
Të premten, fotografitë e një makine të regjistruar në Suedi me një targë ku shkruhej “F..k PSD!” u përhapën në rrjetet sociale. Policia lokale nuk mundi të gjente një arsye për të gjobitur pronarin.
Gjithashtu të premten, një grup aktivistësh anti-korrupsion në Cluj, Transilvani, përdori një traktor për të shkruar “F..k PSD!” në një fushë pranë qytetit. Pasi policia u tha atyre ta hiqnin mesazhin, ata e zëvendësuan atë me “Ne ju shohim” – një tjetër slogan që përdoret nga lëvizja #rezist.