Procesi i emetimit të bondeve sovrane u mbyll të martën me shitjen e 500 milionë eurove me afat maturimi 7 vjeçar. Interesi i bondeve shqiptare është ndjeshëm më i lartë se sa ai i bondeve maqedonase apo malazeze.
Qeveria shqiptare arriti të shesë tituj borxhi në masën 500 milionë euro përkundrejt një interesi vjetor fiks prej 3.55% dhe afat maturimi 7 vjeçar, bëri të ditur kryeministri Edi Rama në një status në rrjetet sociale.
Interesi i marrë është ndjeshëm më i lartë se sa bondet e ngjashme të emetuara nga Maqedonia më herët këtë vit por shumë më i ulët se sa interesi i bondeve shqiptare të emetuara në vitin 2015.
Në janar 2018, pavarësisht se Maqedonia gjendej në një krizë të thellë qeverisëse, arriti të emetojë 500 milionë euro bonde shtatëvjeçare përkundrejt një kuponi vjetor prej 2.75%. Nga ana tjetër Mali i Zi emetoi 500 milionë euro bonde 7 vjeçare përkundrejt një kuponi prej 3.375% në vit.
Në vitin 2015, Shqipëria emetoi 500 milionë euro bonde përkundrejt interesit 5.75% ndërsa në vitin 2010 bondet u emetuan me interesin 7.5%.
Kryeministri Rama shpalli se rënia e interesit është rezultat i asaj që e quajti rezultat i reformave të qeverisë së tij. “Sot paguajmë 3.5% bond 7-vjeçar. Shqipëria shihet si një investim i sigurt e premtues falë reformave transformuese,” tha Rama.
Interesat e bondeve sovrane të vendeve në zhvillim kanë ardhur në rënie të vazhdueshme përgjatë viteve të fundit, kryesisht si pasojë e zgjidhjes së krizës greke dhe qetësimit të krizës në eurozonë.
Interesat e ulëta të bondeve të reja të emetuara nënkuptojnë gjithashtu një lajm të keq për Ministrinë e Financave, e cila ka shpallur planin që të përdorë rreth 200 milionë nga të 500 milionët për të blerë gradualisht dhe para afatit të maturimit një pjesë të bondeve të emetuara në vitin 2015. Primi mbi vlerën minimale që Ministria e Financave do të duhet të paguajë për këto bonde pritet të jetë i lartë për shkak se këto bonde tashmë konsiderohen si asete me vlerë për shkak se vijojnë të japin interes neto prej 5.75%.
