Pasuria e kryetarit të bashkisë Kurbin, e cila vjen si rrjedhojë e të ardhurave nga emigracioni, ka shënuar rënie gjatë tre viteve të fundit.
Artur Bardhi u zgjodh në krye të Bashkisë Kurbin në vitin 2015 si kandidat i Partisë Socialiste me 82.79% të votave, duke qenë kandidati i vetëm në garë, pas tërheqjes së rivalit nga Partia Demokratike. Pjesëmarrja e votuesve në zgjedhje ka qenë e ulët, pasi në këtë bashki votuan gjithsej 14,290 votues, 26.18% e zgjedhësve.
Sipas kurrikulumit jetësor të publikuar, nga viti 1992 deri në vitin 2005 Bardhi ka qenë emigrant në Europë dhe nga viti 2005 deri në vitin 2011 administrator i një biznesi familjar. Gjatë kësaj periudhe, nga viti 2006 deri në vitin 2009 ai është diplomuar për drejtësi. Bardhi është anëtarësuar në Partinë Socialiste në vitin 2008 dhe nga viti 2011 e në vazhdim ka qenë anëtar i Asamblesë së Përgjithshme të Partisë Socialiste. Ai është zgjedhur për herë të parë në krye të bashkisë së Kurbinit në vitin 2011.
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit, në prag të zgjedhjeve lokale të 30 qershorit.
Skeda grafike e mëposhtme paraqet pasurinë e deklaruar nga kryetari bashkisë Kurbin nga viti 2011 deri në fund të vitit 2017. [Kliko për skedën në PDF]
Pasuria e deklaruar e subjektit në vitin e parë të deklarimit, 2011, kap një vlerë prej 23.8 milionë lekë, ndërkohë në 31 dhjetor 2017, pasuria e deklaruar e subjektit ka një vlerë prej 18.1 milionë lekë – duke shënuar një pakësim prej 1.3 herë.
Pasuria e kryebashkiakut të Kurbinit përbëhet nga një shtëpi banimi 3 katëshe, me sipërfaqe 500 m2 dhe vlerë 18.1 milionë lekë dhe 20,000 m2 tokë truall. Ai në vitin 2011 zotëronte një BMË X5 me vlerë 45,000 euro, të cilën e ka shitur në vitin 2015 për 980 mijë lekë.
Të ardhurat e kreybashkiakut gjatë periudhës së deklarimit kapin vlerën 10.1 milionë lekë, nga të cilat 6.7 milionë lekë vijnë nga paga për shkak të funksionit dhe 2.8 milionë lekë nga paga e familjarëve.
Deklarata para fillimit të detyrës
Deklarata e pasurisë e vitit 2011
Deklarata e pasurisë e vitit 2012
Deklarata e pasurisë e vitit 2013
Deklarata e pasurisë e vitit 2014
Deklarata e pasurisë e vitit 2015
Deklarata e pasurisë e vitit 2016
Deklarata e pasurisë e vitit 2017
Për më shumë dokumente vizitoni databazën tonë dokumente.reporter.al
