Në përpjekje për të deligjitimuar një dekret kontravers të Presidentit Ilir Meta mbi datën e zgjedhjeve, Partia Socialiste dhe deputetët zëvendësues nga listat e PD dhe LSI, votuan me 100 vota një rezolutë që e shpall aktin e Metës “nul dhe sikur nuk ka ekzistuar asnjëherë”. Presidenca këmbëngul se dekreti është i ligjshëm dhe KQZ duhej ta zbatonte.
Pa hasur në ndonjë rezistencë në Kuvendin e braktisur nga PD dhe LSI prej muajsh, Partia Socialiste miratoi të enjten një rezolutë e cila e cilëson “nul dhe sikur nuk ka ekzistuar asnjëherë”, dekretin e disa ditëve më parë të Presidentit të Republikës për datën e zgjedhjeve.
Rezoluta u miratua me 100 vota pro, duke përfshirë edhe deputetët zëvendësues që hyn nga listat e PD dhe LSI, 7 më shumë se shumica e cilësuar që i duhet Kuvendit për të filluar procedurën e shkarkimit të Presidentit. Megjithatë në të nuk përmendet fjala shkarkim që ishte lakuar nga përfaqësues të PS pas dekretit, por vetëm vihet në dukje se ai ishte i “kundraligjshëm” dhe se përgatitjet për zgjedhje më 30 qershor duhet të vijonin.
Menjëherë pas votimit në Kuvend, Presidenca reagoi duke riktheksuar se dekreti i Presidentit ishte në fuqi dhe KQZ duhej ta zbatonte. “Ky organ është i detyruar ta zbatojë. Çdo anashkalim i detyrave nga ky institucion është i patolerueshëm nga ligji”, tha në një konferencë për mediat këshilltari i Presidentit Bledar Dervishaj.
Kryeministri Edi Rama i cili mbajti një fjalë të gjatë në Kuvend rreth vendimit të Presidentit, që u zgjodh me votat e PS para zgjedhjeve të vitit 2017, e akuzoi atë për shkelje të Kushtetutës ndërsa ironizoi Metën. “Çfarë kërkon Meta më shumë nga Shqipëria? I cili pa mbushur 50 vjeç e ka bërë si askënd si askush në tjetër në histori. Kujt më shumë se Metës i janë falur hiletë e skandalet”, tha Rama, që e cilësoi dekretin për anullimin e zgjedhjeve si “akt brutal, të papërgjegjshëm dhe budallallëk”.
Nga ana tjetër presidenca e cilësoi seancën e kuvendit një shanc të humbur për reflektim. “Në vend të një diskutimi mbi argumentat ligjorë, dhe në vend që sot të ishte një moment reflektimi e të diskutohej mbi veprimet pozitive për negociatat apo zgjidhjen e krizës, u lëshuan lumenj fyerjesh”, tha Dervishaj duke iu referuar rezolutës.
Ashtu si vendimi i Presidentit Ilir Meta edhe rezoluta e miratuar në Kuvend janë me ligjshmëri të diskutueshme.
Kreu i Opozitës Lulëzim Basha e cilësoi rezolutën “Një farsë” dhe “teatër” të kryeministrit Edi Rama. “Mos kini asnjë iluzion se farsa e sotme përfundoi në rezolutë dhe po konsumon orët e pasdites për tu shndërruar në një pendim të Edi Ramës”, tha Basha para gazetarëve.
Meta vendosi të shtunën të dekretojë shfuqizimin e dekretit për zhvillimin e zgjedhjeve për pushtetin vendor më 30 qershor 2019 pa dhënë shpjegime. Rama deklaroi se dekreti për çdekretim është nul dhe se zgjedhjet do të zhvillohen më 30 qershor.
Presidenti Meta njoftoi të shtunën e kaluar se kishte vendosur të anullonte datën e zgjedhjeve dhe të hënën në mëngjes argumentoi para gazetarëve vendimin e shfuqizimit të dekretit me të cilin kishte caktuar 30 qershorin.
“Pa patur një datë të caktuar nga presidenti i Republikës, zgjedhjet nuk mund të zhvillohen në Republikën e Shqipërisë,” tha Meta duke shtuar se e kishte ndërmarrë vendimin në bazë të funksionit të tij si “përfaqësues i unitetit të popullit”.
Partitë politike të opozitës, ku bën pjesë edhe ish-partia e Metës, Lëvizja Socialiste për Integrim, vendosën në mënyrë të paprecedentë të mos marrin pjesë në zgjedhjet për pushtetin vendor të këtij viti, duke kërkuar rrëzimin e qeverisë dhe duke pretenduar se qeveria përdor krimin e organizuar për të fituar zgjedhjet.
Maxhoranca pati shpresuar se do të arrinte të zhvillonte zgjedhje për pushtetin vendor edhe pa praninë e opozitës. Deri tani në shumicën e bashkive ka vetëm një kandidat për kryetar ndërsa në një pjesë konkurrojnë disa të pavarur dhe disa të partisë së re Bindja Demokratike.
Lëvizja e Metës duket se synon saktësisht të ulë edhe më tej legjitimitetin e zhvillimit të zgjedhjeve me një palë. Vendi gjendet aktualisht pa një gjykatë kushtetuese funksionale që të mund të zgjidhë mosmarrëveshjet e këtij niveli.
