Prokuroria e Krimeve të Rënda njoftoi se kishte përfunduar hetimet për një pjesë të “dosjes 339” dhe ka dorëzuar në gjykatë kërkesën për gjykim ndaj ish-deputetit të PS Arben Çuko dhe 4 personave të tjerë të akuzuar për korrupsion. Çuko i ka mohuar akuzat.
Dy prokurorët e Krimeve të Rënda që po hetojnë dosjen 339, e cila u bë e njohur pasi një sërë përgjimesh brenda saj lidhën funksionarë të lartë të Partisë Socialiste me një grup të dyshuar për trafik narkotikësh, të përfshirë në fushatën elektorale dhe blerje e frikësim votuesish, njoftuan dërgimin në gjykatë të një pjese të dosjes pagëzuar si “339/2” me të akuzuar ish-deputetin dhe ish-Drejtorin e Përgjithshëm të Burgjeve Arben Çuko.
Çuko dhe katër persona të tjerë, përfshi të arrestuar për akuza të grupit kriminal dhe trafikut të narkotikëve, akuzohen nga Prokuroria e Krimeve të Rënda për korrupsion pasiv dhe aktiv të funksionarëve të lartë.
“Prokuroria pranë Gjykatës së Shkallës së Parë për Krime të Rënda Tiranë me datë 19.06.2019 ka paraqitur kërkesë për gjykimin e çështjes penale nr. 339/2 të vitit 2016 në ngarkim të të pandehurve”, thuhet në një njoftim të prokurorisë. Veç Çukos nën akuzë janë edhe Qerim Musha, Olsi Karagjozi, Artur Balla dhe Denis Llaftiu.
BIRN nuk mundi të kontaktonte me avokatët e të akuzuarve. Pas arrestimit avokati i Çukos, Maks Haxhia u tha mediave se i mbrojturi prej tij nuk e kishte kryer veprën penale për të cilën akuzohej. Haxhia pretendoi atëherë se ish-deputetit socialist, Arben Çuko, nuk kishte pranuar transferimin e të burgosurit nga burgu i Burrelit në atë të Peqinit.
Sipas prokurorisë kjo ka ndodhur, por trasferimi është bërë në një burg tjetër. “Si rezultat i përdorimit të këtyre metodave të hetimit, nga përgjimi i bisedave telefonike të të pandehurve Arben Çuko, Artur Balla, Qerim Musha, Olsi Karagjozi, Denis Llaftiu, është dokumentuar veprimtaria e kundraligjshme e këtyre personave, të cilët kundrejt dhënies dhe përfitimit të paligjshëm në vlera monetare dhe materiale, kanë realizuar transferimin e të dënuarit Olsi Karagjozi nga vendi i vuajtjes së dënimit në IEVP Burrel, në një vend tjetër vuajtje dënimi, sipas preferencës së vetë të dënuarit, në IEVP Fier”, thuhet në komunikatën e shpërndarë nga prokurorët e çështjes Vladimir Mara dhe Dritan Prençi.
Një investigim i BIRN dhe Zërit të Amerikës më herët zbuloi nga përgjimet e Çukos edhe ndikimin politik në emërimet në burgje dhe falsitetin e konkurseve publike apo ndërhyrjet për punësime nga zyrtarë lokalë dhe deputetë të Partisë Socialiste. “Ki parasysh që Lushnja nuk ka asnjë vend bosh, Fieri ka 20 vende dhe kanë sjellë 200 veta. Testimi këtë herë u bë me 1358 veta dhe të gjithë ishin listat e partisë. E kishin të qartë ata, hajt se po i fusim në burgje,” thotë Çuko në një prej transkripteve që BIRN ka parë.
Po ashtu përgjime të pjeshme të nxjerra po prej kësaj dosje zbuluan angazhimin e të akuzuarve për “trafik narkotikësh” dhe “grup të strukturuar kriminal” në blerje votash e frikësim votuesish në zgjedhjet e vitit 2017 dhe lidhjet e tyre me kryebashkiakun e Durrësit Vangjush Dako. Dako i ka mohuar akuzat.
Të akuzuarit e tjerë në këtë pjesë të dosjes së dërguar për gjykim janë shoferi i Çukos, i burgosuri Karagjozi, një ndërmjetës dhe Denis Llaftiu që po ashtu është në akuzë për trafik narkotikësh dhe vepra të tjera penale.
Çuko dhe katër të tjerët u arrestuan në tetor të vitit të kaluar në një operacion të pagëzuar “Vol-Vo4”. Prokuroria njoftoi atëherë edhe arrestimin e ish-deputetit tjetër të PS Arben Ndoka vëllai të tij dhe të afërmve të tyre, të akuzuar për “tjetërsim pronash” kryesisht në bregdetin e Lezhës.
Bashkë me ta policia e prokuroria njoftuan se kishte ndaluar 27 anëtarë të një organizate trafiku narkotikësh të drejtuar nga vëllezërit nga Avdyli nga Shijaku, të dënuar edhe më parë për vepra të rënda penale.
Prokuroria ka njoftuar se dosja në fjalë është një nga dosjet më voluminoze. Në një dalje publike, pas akuzave nga opozita se nuk po hetohej ndikimi në zgjedhjet e vitit 2017 e të dyshuarve për trafik narkotikësh dhe as lidhjet e tyre me kryebashkiakun në detyrë të Durrësit Vangjush Dako, drejtuesja e prokurorisë së Krimeve të Rënda, njoftoi se për këtë dosje ishin 74 persona në hetim.
Deri tani në gjykim, veç Çukos dhe 4 të akuzuarve të tjera, janë dërguar për gjykim edhe 12 të akuzuar për “Prodhimi dhe shitja e narkotikëve”, në bashkëpunim, “ Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, parashikuara nga nenet 283/2, 333/a dhe 334 të Kodit Penal.
Pjesa e parë e dosjes dërguar për gjykim ka të pandehur nipat e ish-deputetit Arben Ndoka. Prokuroria ka bërë me dije se të pandehur për këtë çështje janë “Ramadan Dushaj,Rezart Çaçani, Fatbardh Gostini, Neritan Saraçi, Ardit Haxhagiqi, Gentjan Marku, Oltion Noka, Fation Marku, Samuel Ndoka, Vilson Ndoka, Elis Guri dhe Luan Boça”.
Damjan Ndoka dhe Vilson Ndoka nipat e ish-deputetit Arben Ndoka, janë dënuar ndërkohë më herët nga Gjykata e Shkodrës e Shkallës së Parë për akuzën e tentativës së vrasjes. Vetë ish-depueti dhe të afërm të tjerë janë në akuzë për tjetërsim pronash, ndërsa vëllai i tij veç akuzës për tjetërsimin e pronave në bregdet, akuzohet edhe për përfshirje në trafik narkotikësh.
Prokuroria bën me dije se vijon hetimet edhe për fakte të tjera penale që kanë dalë nga hetimi i kësaj çështje. Pjesët e kësaj dosje që kanë të bëjnë me ndikimin e grupeve kriminale në zgjedhjet e vitit 2017, janë ende pa të akuzuar zyrtarisht. Opozita, që dogji mandatet bazuar mbi përgjimet në këtë dosje, akuzon prokurorinë se nuk po heton.
