Në zgjedhjet e së dielës, kandidatët ishin fitues që para se kutitë e votimit të hapeshin, por votat e pavlefshme duket se ishin lajmi kryesor i rezultatit, i cili, ndonëse numërimi ka përfunduar, nuk është publikuar ende nga KQZ në nivel të detajuar.
Komisioni Qendror i Zgjedhjeve bëri të ditur se 812 mijë shqiptarë hodhën votë të dielën, por sistemi i raportimit statistikor të këtij institucioni duket se është në nivelin më të keq në shumë zgjedhje.
Në një njoftim të shkurtër mëngjesin e së mërkurës, KQZ, e cila është e ndarë mes shumicës së anëtarëve të emëruar nga socialistët dhe pakicës demokrate, bëri të ditur se numërimi ka përfunduar mbrëmjen e kaluar dhe rezultati është 812 mijë vota të hedhura me pjesëmarrje 23%. Siç dihet, socialistët fituan 60 bashki nga 61 dhe kandidatët e tyre si dhe kundërshtarët e paktë morën bashkërisht 766 mijë vota. Ndërkohë, bashkia e Finiqit u fitua nga partia minoritare MEGA në aleancë me socialistët.
Diferenca prej 45 mijë votash, janë vota të pavfeflshme, ose 5.5% e totalit të votave të hedhura. Në votat për këshillat bashkiake, të pavflefshmet ishin 50 mijë. Ndarja e votave të pavlefshme sipas bashkive apo sipas qendrave të votimit është për momentin e pamundur sepse KQZ nuk ka raportuar rezultate të tilla. Por në nivel kombëtar, këto janë zgjedhjet rekord për sa i përket numrit të votave të pavlefshme.
Kështu, në zgjedhjet e vitit 2017, votat e pavlefshme ishin 32 mijë ose më pak se 2% e të gjithë votave të hedhura në ato zgjedhje, ndërsa në vitin 2013, votat e pavlefshme ishin 24 mijë ose 1.4%.
Në zgjedhjet e vitit 2015, kishte 38 mijë vota të pavlefshme ose 2.4% të totalit.
Shqiptarët votuan të dielën formalisht për të zgjedhur kryetarë bashkish dhe këshilltarë bashkiakë, por në thelb ata zgjodhën kryetarë bashkish pa garë dhe u ftuan të votonin ose të bojkotonin në një formë referendumi mbi qëndrimet e ndryshme të qeverisë dhe opozitës, me aspak lidhje me çështje të pushtetit vendor.
Nga ana tjetër, këto ishin edhe zgjedhjet me raportimin më të keq të rezultateve nga KQZ prej shumë kohësh.
Shqiptarët janë mësuar së paku që nga viti 2011 që Komisioni Qendror i Zgjedhjeve të raportojë në mënyrë të detajuar rezultatet e zgjedhjeve ndërsa ato dilnin nga grupet e numërimit në faqen zyrtare të internetit të KQZ-së.
Në zgjedhjet e vitit 2017 për pushtetin qendror, shqiptarët kishin mundësi të shikonin rezultatin e votave në çdo kuti votimi pak minuta pasi numërimi i saj përfundonte [link]. Por në zgjedhjet e vitit 2019, kjo gjë nuk ishte e mundur.
Të dhënat e publikuara nga KQZ në një hartë të titulluar “Të Dhëna Paraprake” [link], paraqisnin të dhëna të agreguara në nivel bashkish, por jo në nivel njësish administrative apo qendrash votimi. Ndërsa përkeqësimi i raportimit të rezultateve mund të jetë një rastësi, në kushtet kur opozita ankohet për kuti të mbushura, ky raportim ndjeshëm më i keq se në zgjedhjet e kaluara ka gjasa do të rrisë mosbesimin e përgjithshëm të shqiptarëve ndaj sistemit zgjedhor.
Komisioni Qendror i Zgjedhjeve është kritikuar jo vetëm nga opozita por edhe nga vëzhguesit ndërkombëtarë për shkak të asaj që vëzhguesit e cilësuan si “interpretim jokonsistent të ligjeve” si dhe “interpretim të ligjit në mënyrë krijuese”.
Kritika më e madhe ndaj KQZ-së ishte lejimi i krijimit të komisioneve të qendrave të votimit, të komisioneve zonale të administrimit zgjedhor dhe të grupeve të numërimit në mënyrë të njëanshme me militantë socialistë, gjë që e bën të gjithë procesin e administrimit zgjedhor të pabesueshëm.
Prokuroria nga hapur hetime për të paktën një rast dhe po verifikon disa kallëzime të tjera, por prokuroria ka një histori të gjatë të mosndëshkimit të krimeve zgjedhore në Shqipëri [Link].
