Kryetari i sindikatës së naftëtarëve të Ballshit, Sokol Dautaj tha se nuk janë të kënaqur me zgjidhjen e pjesshme të ofruar nga kryeministri Edi Rama –por e pranuan atë të detyruar nga kushtet e vështira ekonomike.
Gratë naftëtare të Kombinatit të Përpunimit të Thellë të Naftës në Ballsh i dhanë fund të hënën grevës së urisë – pasi kryeministri Edi Rama i takoi dhe u premtoi një pagë të papërcaktuar deri në rifillimin e punës, pa marrë përsipër që të zgjidhë problemin e rrogave të prapambetura.
“Gjendja shëndetësore e kolegeve, ashtu si edhe ne më parë nisi të rëndohej… . Gjithashtu greva nuk mund të vazhdonte pa fund. Nisur edhe nga deklaratat e kryeministrit se do të ulej në diskutime nëse dilnim nga greva, menduam ta vendosnim ‘topin’ në fushën e tij,” tha për BIRN kreu i sindikatës së naftëtarëve të Ballshit, Sokol Dautaj.
Dautaj shpjegoi se gjatë takimit të së hënës me kryeministrin Edi Rama, naftëtarët u kishin qëndruar të gjitha kërkesave të tyre, përfshi rifillimin e punës dhe shlyerjen e pagesave të prapambetura. Ai shtoi se Rama kishte ofruar dhënien e një page mujore nga shteti deri në fillimin e punës, por nuk kishte marrë përsipër zgjidhjen e pagave të prapambetura.
“Dakordësia e arritur nuk është e kënaqshme…, por të detyruar nga situata e vështirë ekonomike, e pranuam. Për pagat e prapambetura do ta ndjekim çështjen deri në Strasburg,” tha për BIRN kreu i sindikatës, Dautaj.
Pas privatizimit të dështuar të vitit 2008 dhe ndërrimit të disa duarve, rafineria e Ballshit u mor në administrim në mars të vitit 2018 nga kompanitë Tosk Energji dhe Bylis Energji, të cilat janë në pronësi të dy kompanie zvicerane, CFD Conseils Sarl dhe PGFS Pilotage & Gestion S.
Së fundmi, KPTHN e Ballshit administrohet nga kompania Allum Enterprises, e cila edhe pse negocioi me naftëtarët pas protestave të tyre, nuk dha ndonjë zgjidhje konkrete për rifillimin e punës dhe pagesën e rrogave të prapambetura.
Prej janarit të këtij viti, naftëtarët e uzinës së Ballshit kanë mbetur pa punë dhe pa paga –ç’ka i shtyu ata drejt një vale protestash dhe një greve urie që filloi në 28 shtator. Për shkak të gjendjes së rënduar, burrat në grevë u zevëndësuan nga koleget e tyre gra në mesin e tetorit.
Në tre javët e fundit, kryeministri Edi Rama kërkoi ndërprerjen e grevës së urisë si kusht për t’u ulur në bisedime me naftëtarët. Pas takimit të së hënës, naftëtarët e Ballshit nuk e dinë ende se sa do të jetë paga që do t’u akordojë qeveria.
“Nuk është përcaktuar ende se sa do të jetë vlera, por u diskutua se mund të jetë midis pagës minimale dhe rrogës tonë. Presim të ulemi sërish brenda 48 orëve për të vendosur për vlerën e pagës që do të merret deri në rifillimin e punës,” tha Dautaj për BIRN.
Ai tha se në takim kishin këmbëngulur që shteti të ofronte garanci për naftëtarët në të ardhmen –ndërsa kryeministri Rama ishte përgjigjur se po negociohej me kompani serioze, por pa dhënë detaje konkrete.
