Kadri Veseli, kryetari i Partisë Demokratike të Kosovës dhe një bashkëthemelues i Ushtrisë Çlirimtare të Kosovës, u vetëdeklarua i pafajshëm për krime lufte në Dhomat e Specializuara të Kosovës në Hagë.
Kadri Veseli i tha gjyqtarit në daljen e tij të parë para Dhomave të Specializuara të Kosovës në Hagë të martën se ai është i pafajshëm për krime lufte dhe krime kundër njerëzimit.
“Më lejoni të them me bindje të plotë se nuk jam fajtor për asnjë nga akuzat”, tha Veseli në seancën paraprake.
Veseli akuzohet, së bashku me presidentin e dorëhequr së fundmi të Kosovës Hashim Thaçi dhe dy ish-guerilas të tjerë të UÇK-së, për kryerjen e një serie krimesh duke përfshirë ndalime të paligjshme, tortura, vrasje, zhdukje me forcë dhe persekutim nga “të paktën marsi 1998 deri në shtator 1999” në Kosovë dhe Shqipëri.
Aktakuza pretendon se burrat ishin pjesë e një “ndërmarrje të përbashkët kriminale” që synonte të merrte kontrollin mbi Kosovën “duke përfshirë kanosjen, keqtrajtimin, kryerjen e dhunës kundër dhe në mënyrën e paligjshme ndaj atyre që konsideroheshin si kundërshtarë”.
Shumica e krimeve në aktakuzë u kryen në qendra të ndryshme paraburgimi të UÇK-së në të gjithë Kosovën dhe në Kukës dhe Has në Shqipëri.
Avokati i Veselit, Ben Emmerson, citoi nga një deklaratë të bërë nga i pandehuri kur ai u arrestua, e cila vuri në dukje se Dhomat e Specializuara të Kosovës u krijuan nën legjislacionin e vetë Kosovës dhe këmbënguli se “gjykatësit do të japin një rezultat të drejtë”.
“Kjo gjykatë është pjesë e rrugëtimit të Kosovës drejt shtetësisë dhe ne duhet ta shohim këtë deri në fund”, tha ai përmes një lidhje me video me gjykatën e Hagës.
Veseli shërbeu si kryetar parlamenti deri në zgjedhjet e fundit dhe udhëhoqi Partinë Demokratike të Kosovës, PDK. Ai nuk e ka dhënë ende zyrtarisht dorëheqjen nga posti i deputetit në Kuvendin e Kosovës.
Thaçi, i cili ishte udhëheqësi politik i UÇK-së gjatë luftës, dha dorëheqjen si president i Kosovës javën e kaluar pasi u konfirmuan akuzat kundër tij. Ai u vetëdeklarua i pafajshëm të hënën.
Ish-zëdhënësi i UÇK-së Jakup Krasniqi gjithashtu u vetëdeklarua i pafajshëm në daljen e tij të parë para gjykatës të hënën.
Personi i katërt i akuzuar në aktakuzë, Rexhep Selimi, kreu i grupit parlamentar të partisë më të madhe të opozitës në Kosovë, Lëvizja Vetëvendosje, do të dalë për herë të parë në gjykatë të mërkurën.
Dhomat e Specializuara të Kosovës u krijuan për të gjykuar krime të dyshuara të kryera gjatë dhe menjëherë pas luftës në Kosovë nga viti 1998 deri në 2000. Ato janë pjesë e sistemit gjyqësor të Kosovës, por të vendosura në Holandë dhe përbëhen nga staf ndërkombëtar.
Ato u krijuan nën presion nga aleatët perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështjet e UÇK-së dhe të mbronte dëshmitarët nga ndërhyrjet.
E ashtuquajtura “Gjykatë Speciale” nuk shihet me sy të mirë nga shqiptarët e Kosovës që e shohin atë si një fyerje ndaj luftës së UÇK-së për çlirim nga sundimi serb.
