Avokatët mbrojtës për ish-komandantët e Ushtrisë Çlirimtare të Kosovës, përfshirë ish-presidentin Hashim Thaçi, pretenduan se prokuroria e Hagës po përpiqet të pengojë mbrojtjen duke kufizuar kohën për t'u përgatitur për gjyqin e tyre për krime lufte.
Avokatët mbrojtës të presidentit të dorëhequr së fundmi të Kosovës Hashim Thaçi dhe tre-ish luftëtarëve të tjerë guerilë të kthyer në politikanë të akuzuar për krime lufte dhe krime kundër njerëzimit argumentuan në një konferencë statusi në Dhomat e Specializuara të Kosovës të enjten se prokuroria po përpiqet të kufizojë aftësinë e mbrojtjes për t'u përgatitur për gjykimin.
Prokuroria tha të enjten se do të paraqesë përmbledhjen paraprake, e cila përfshin provat dhe argumentet ligjore të planifikuara për t'u përdorur në gjykim nga prokuroria, vetëm në një maksimum prej tre muajsh para fillimit të gjyqit.
“Ne do të paraqesim përmbledhjen e procedurës paraprake në korrik 2021, dy deri tre muaj para fillimit të gjyqit”, tha prokurori Alan Tieger, duke nënkuptuar se ai pret që gjyqi të fillojë në shtator.
“Edhe nëse data e fillimit të gjyqit ndryshon, ne do t'i mbetemi qëndrimit tonë për t'i paraqitur ato dy deri tre muaj para gjyqit”, shtoi Tieger.
Avokatët mbrojtës për Thaçin dhe të bashkë-akuzuarit e tij, Kadri Veseli, Jakup Krasniqi dhe Rexhep Selimi, thanë se kjo do të kufizonte aftësinë e mbrojtjes për të hetuar dhe përgatitur argumentet e saj kundër provave të prokurorisë.
Ben Emmerson, këshilltari kryesor për Veselin, argumentoi se “ata duan të kufizojnë mbrojtjen duke vendosur një limit prej tre muajsh për t'u përgatitur”.
Ai shtoi se po shkelej e drejta për një gjykim të drejtë dhe se “këtu po ndodh një pritë gjyqësore”.
Mbrojtja ka thënë se do t'i duhen minimumi 18 muaj për të lexuar, analizuar dhe më pas hetuar si duhet sasinë e provave që ka prokuroria.
Një kërkesë e redaktuar prej 600 faqesh për të paraqitur prova mbështetëse shtesë u paraqit gjithashtu nga prokuroria të hënën, duke shpjeguar provat që prokuroria thotë se ka dhe që vërtetojë se Thaçi dhe tre të paditurit e tjerë urdhëruan vrasjen dhe keqtrajtimin e kundërshtarëve.
Prokuroria pretendoi se ka prova në formën e rrëfimeve të dëshmitarëve, pamjeve video dhe deklaratave nga vetë të akuzuarit, të cilat tregojnë se Thaçi dhe të tjerët kishin një pushtet të jashtëzakonshme brenda Ushtrisë Çlirimtare të Kosovës.
Ajo pretendoi se një komunikatë nga Shtabi i Përgjithshëm i UÇK-së, në të cilin ishin anëtarë të katër të akuzuarit, kërcënoi kundërshtarët duke cituar vrasjet e dy “bashkëpunëtorëve” të supozuar të autoriteteve serbe gjatë kohës së luftës.
“Ekzekutimi i tyre është një paralajmërim për të gjithë bashkëpunëtorët e armikut dhe tradhtarët e kombit, veçanërisht për ata që me pretekstin e presionit nga qendra të caktuara ndërkombëtare të pushtetit mund të hyjnë në ujdi për të nënshkruar marrëveshje me okupatorin, kundër interesave kombëtare”, citoi prokuroria të thuhej në komunikatë.
Prokuroria gjithashtu pretendoi që i pandehuri Selimi e përshkroi një sulm ndaj një shkolle në 1996 si “një mesazh për kolonzatorët serbë” dhe një “deklaratë politike”.
Më tej, ajo pretendoi se ka prova që tregojnë se të katër të pandehurit ishin në dijeni të krimeve të pretenduara të kryera nga luftëtarët e UÇK-së.
Thaçi dhe ish-shokët e tij të UÇK-së janë vetëdeklaruar të gjithë të pafajshëm.
Dhomat e Specializuara të Kosovës u krijuan, nën presionin e aleatëve perëndimorë të Kosovës, për të gjykuar krime të pretenduara të kryera gjatë dhe menjëherë pas luftës së Kosovës nga viti 1998 deri në vitin 2000. Ato janë pjesë e sistemit gjyqësor të Kosovës, por të vendosura në Holandë dhe përbëhen nga staf ndërkombëtar.
E ashtuquajtura “Gjykata Speciale” nuk shihet me sy të mirë nga shqiptarët e Kosovës, të cilët e konsiderojnë atë si një fyerje të luftës së UÇK-së për çlirim nga sundimi serb.
