Grupi Këshillimor kundër Krimit Mjedisor bën thirrje për ndërgjegjësim dhe përmirësim të veprimeve institucionale ligjore kundër krimit mjedisor në Shqipëri, i cili në vitin e fundit rezulton të jetë rritur në mungesë së ndëshkueshmërisë dhe ndjekjes së raportimeve të kryera prej aktivistëve, qytetarëve apo gazetarëve.
Organizatat mjedisore të shoqërisë civile shprehën të premten nëpërmjet një takimi online shqetësimin e tyre lidhur me rritjen e nivelit të krimit mjedisor në vitin 2020, si edhe mbi shkallën e ulët të ndëshkueshmërisë së këtyre veprave penale.
Organizatat gjithashtu kërkuan nga autoritetet përgjegjëse të forcohet i tërë zinxhiri i mekanizmit ligj-zbatues: monitorimi, raportimi, si edhe ndjekja e çështjes deri në instancat gjyqësore.
“Në emër të Grupit Këshillimor kundër Krimit Mjedisor (GKKM) shprehim shqetësimin tonë lidhur me rritjen e veprave të krimit mjedisor dhe të dëmtimit të mjedisit në përgjithësi në vendin tonë si: prerja e paligjshme e pyjeve, ndotja e ujërave apo dëmtimi i faunës së egër”, citohet në deklaratën për shtyp të organizatave mjedisore.
Sipas tyre, krimi mjedisor në Shqipëri është rritur gjatë vitit 2020, ndërkohë që ndëshkueshmëria e krimeve është ulur.
“Të gjitha këto tregojnë se vendit i mungon ende një sistem i organizuar raportimi, parandalimi,dhe ndjekje të krimeve mjedisore”, citon deklarata e përbashkët e organizatave të shoqërisë civile.
Të dhënat e siguruara prej Prokurorisë së Përgjithshme mbi rastet e veprave penale të krimit mjedisor në Shqipëri, për një periudhë 9 mujore, tregojnë se viti 2020 ka shënuar rritje të numrit të veprave të krimit mjedisor, me 254 raste të trajtuara dhe 146 të pakonsideruara, ndërkohë që ndëshkueshmëria figuron vetëm me 5% te rasteve te referuara në prokurori.
Një shqetësim tjetër i aktivistëve mjedisorë është se edhe këto raste të ndëshkuara nuk reflektojnë realitetin.
“Ndonëse ka shumë raste të raportuara nga organizatat mjedisore apo në rrjetet sociale nga IKMT që lidhen me dëmtimin e faunës së egër, apo shkarkimet e inerteve të paligjshme në lumenj, ato nuk reflektohen në statistikat e Prokurorisë të siguruara nga Grupi. Prandaj është e nevojshme nxitja e hetimeve nga prokuroria kur bëhen publike rastet e krimit mjedisor nga organizatat e shoqërisë civile nëpërmjet rrjeteve të tyre të komunikimit.”- u shpreh Aleksander Trajçe nga Qëndra për Ruajtjen dhe Mbrojtjen e Mjedisit Natyror në Shqipëri (PPNEA).
Nga ana tjetër, Mihallaq Qirjo, përfaqësues i Qendrës Burimore të Mjedisit në Shqipëri (REC Albania) theksoi nevojën për forcimin e mekanizmit ligj-zbatues në tërësi.
“Të forcohet i tërë zinxhiri i mekanizmit ligj-zbatues: monitorimi, raportimi, ndjekja e çështjes deri në instancat gjyqësore”, u shpreh Qirjo.
Institucionet përgjegjëse për zbatimin e ligjit, sidomos me përfshirjen e dispozitave të posaçme mbi krimin mjedisor në Kodin Penal, duhet të marrin përsipër pa vonesë përgjegjësitë ligjore që i takojnë”, përfundoi ai.
Lista e Organizatave kontribuese në Grupin Këshillimor:
Four Paws, Shqipëri
Komiteti Shqiptar i Helsinkit (KSHH)
Qendra Aarhus Shkodër
Qendra Burimore e Mjedisit në Shqipëri (REC Albania)
Qendra Mjedisore për Zhvillim, Edukim dhe Rrjetëzim (EDEN)
Qendra për Mbrojtjen e Ekosistemeve Natyrore në Shqipëri (EcoAlbania)
Shoqata për Ruajtjen dhe Mbrojtjen e Mjedisit Natyror në Shqipëri (PPNEA)
Shoqata Ornitologjike e Shqipërisë (AOS)
Qendra Mjedisore Për Studime dhe Zbatime