Kalo, një avokat biznesi në Tiranë, u emërua nga Presidenti Ilir Meta gjyqtar në Gjykatën Kushtetuese pasi u rendit i pari nga Këshilli i Emërimeve në Drejtësi. Gjykata Kushtetuese u bë në këtë mënyrë me gjashtë anëtarë, nga nëntë që duhet të ketë.
Presidenti Ilir Meta njoftoi të mërkurën se ka dekretuar emërimin e Përparim Kalos si anëtar të Gjykatës Kushtetuese, pak orë pasi mori listën e renditjes nga Këshilli i Emërimeve në Drejtësi. Kalo është themelues dhe administrator i Kalo Associates, një kompani ligjore në Tiranë që ofron konsulencë, kryesisht për biznesin. Sipas përshkrimit të tij në faqen e biznesit, ai ka eksperiencë në “hartimin e legjislacionit tregtar si legjislacioni për koncesionet, energjinë e rinovueshme, lizingu financiar, etj” si dhe punon si përfaqësues i disa prej korporatave të mëdha ndërkombëtare.
Sipas ligjit, Këshilli i Emërimeve në Drejtësi duhej të përzgjidhte te kandidatë, por në këtë rast ishin vetëm dy. Javën e kaluar, Kuvendi i Shqipërisë zgjodhi ish-prokurorin Altin Binaj si anëtar i pestë i Gjykatës Kushtetuese, ku Binaj ishte kandidati i vetëm nga minimumi tre që kërkohen nga ligji.
Anëtarët e tjerë janë: Vitore Tusha, e cila vijon të mbetet në detyrë pasi i ka mbaruar mandati shumë vite më parë; Elsa Toska, e cila u zgjodh nga Kuvendi i Shqipërisë në nëntor 2019; Marsida Xhaferllari e cila u emërua nga Meta në nëntor 2019 dhe; Fiona Papajorgji, e cila ka një karrierë si këshilltare në Gjykatën Kushtetuese.
Shqipëria mbeti pa Gjykatë Kushtetuese në vitin 2018 pasi shumica e anëtarëve të saj u tërhoqën, dhanë dorëheqjen ose u shkarkuan nga vetingu. Plotësimi i vakancave rezultoi një proces i vështirë për shkak se palët politike synuan të kontrollonin procesin në pritje të përplasjeve të mundshme në këtë gjykatë.
Numri gjashtë përbën minimumin për mbledhjen e Gjykatës Kushtetuese në seancë plenare. Megjithatë, në mënyrë që të vendosin për diçka, anëtarët ekzistues duhet të jenë në një mendje në shumicë dërrmuese pasi nevojiten pesë vota për të marrë një vendim.
