Inspektori i Lartë i Drejtësisë, Artur Metani kërkoi shkarkimin e gjyqtares Enkeleida Hoxha për diskretitimin e figurës së gjyqtarit, ndërsa Hoxha dhe avokati i saj kërkuan rrëzimin e raportit dhe pretenduan për sulm politik.
Këshilli i Lartë i drejtësisë, KLGj u njoh të enjten me konkluzionet përfundimtare të Inspektorit të Lartë të Drejtësisë, Artur Metani lidhur me procedimin disiplinor ndaj gjyqtares së Krujës, Enkeleida Hoxha.
Gjyqtarja Enkeleida Hoxha gjendet në paraburgim prej 11 shkurtit, kur u arrestua bashkë me 11 persona të tjerë si pjesë të një strukture kriminale që synonte të lironte disa të dënuar që e vuajnë dënimin në burgun e sigurisë së lartë në Fushë-Krujë, kundrejt përfitimeve monetare.
Njëkohësisht, Hoxha po përballet me një kërkesë për shkarkim të ILD për vendimet e lirimit të Hekuran Billës – i dënuar me burgim të përjetshëm në Mbretërinë e Bashkuar për një vrasje të kryer në 2006 si dhe të lIlir Pajës, i dënuar nga ish-Gjykata e Krimeve të Rënda me 17 vjet burg.
Inspektori i Lartë i Drejtësisë, Artur Metani paraqiti një përmbledhje të raportit me 47 faqe duke renditur shkeljet e konstatuara dhe kërkoi shkarkimin e gjyqtares Hoxha.
Metani tha në seancë se nga hetimi i kryer rezulton e provuar se nga Enkeleida Hoxha janë ndërmarrë veprime dhe mosveprime, të cilat kanë të bëjmë me mosrespektim të rëndë dhe të vazhduar të legjislacionit material dhe procedural penal.
“Nga ana e magjistrates Enkeleida Hoxha nuk janë marrë prova vendimtare për zgjidhjen e çështjes, duke cenuar parimin e paanësisë së gjykimit. Ajo u ka atribuuar të dënuarve gjatë periudhave të njëjta dhënien e cilësive të ndryshme, herë si i paraburgosur dhe herë si i dënuar, në funksion të pranimit të çdo kërkese të paraqitur nga ana e të njëjtit kërkues”, tha Metani dhe theksoi se Hoxha ka aplikuar ulje të njëkohshme dënimi për periudha më të gjata se 12 muaj.
Sipas Inspektorit, Hoxha nuk ka respektuar gjithashtu kriteret ndaluese për përfitim amnistie dhe se është konstatuar një mungesë thelbësore në arsyetimin e vendimeve gjyqësore.
“Arrihet në konkluzionin se veprimet dhe mosveprimet e ndërmarra nga ana e magjistrates Enkeleida Hoxha janë aq serioze, sa kanë cenuar vlerat themelore të saj; besimin që magjistrati duhet të përcjellë te publiku në përmbushjen e misionit dhe rolit të tij në dhënien e drejtësisë; kanë diskretituar rëndë figurën dhe pozitën e gjyqtarit dhe kanë ulur dinjitetin e organit që përfaqëson duke e bërë atë të pa denjë për vazhdimin e ushtrimit të funksionit të magjistratit”, konstatoi Metani dhe kërkoi që KLGj të pranojë kërkesën për fillimin e procedimit disiplinor ndaj gjyqtares Enkeleida Hoxha dhe për shkarkimin e saj.
Pas Metanit e mori fjalën gjyqtarja Enkeleida Hoxha e cila fillimisht sqaroi pamundësinë e saj për paraqitjen e materialeve për shkak të situatës ku ndodhet dhe kërkoi të bënte dy komente. Ajo tha se vendimi për dënimin alternativ të Ilir Pajës për qëndrimin në shtëpi për shkak të gjendjes së tij shëndetësore, ishte bazuar në dokumentacionet e servirura nga insitucioni i vuajtjes së dënimit dhe nga Shërbimi i Provës. Ajo theksoi se vendimi nuk ishte apeluar dhe kishte marrë formë të prerë.
“Shkelja e pretenduar se nuk është kryer akt-ekspertim mjeko ligjor nuk qëndron, pasi gjykata ka administruar gjithë dokumentacionin mjekësor që Ilir Paja ka pasur pranë institucionit të vuajtjes së dënimit,” shpjegoi Hoxha. Ajo vijoi se për një rast tjetër të gjykuar prej saj, ankimi i prokurorit për mungesën e akt-ekspertimit mjeko-ligjor, ishte rrëzuar nga Apeli.
Hoxha tha se kishte pranuar pjesërisht shkeljen në lirimin e Billës dhe se kishte propozuar ndëshkimin me marrëveshje, por jo me shkarkim.
“Billa që prej lirimit derisa u vra nuk ka sjellë asnjë problem dhe kjo përcillet edhe nga raporti i Shërbimit të Provës. Edhe për rastin konkret prokurori i çështjes dhe as titullari i prokurorisë nuk kanë ushtruar ankim,” tha Hoxha.
Ajo solli në vëmendje të KLGj-së se edhe në gjykatat e tjera janë gjykuar e pranuar lirimet e personave të tjerë, të cilët edhe pse kanë pasur fatin e Billës ose kanë kryer vepra të tjera penale, institucionet përgjegjëse dhe media nuk janë ndalur në këto raste.
“Nëse i referohem gjykatës ku punoj, kemi pasur edhe lirime të tjera, ku lirimi është bërë nga një gjyqtare, ku A.K. ka pasur fatin e Billës. Por ky rast nuk është trajtuar as nga institucionet dhe as nga mediat,” u ankua Hoxha dhe shtoi se ankesat e kryera ndaj saj më parë pranë Inspektorit ishin arkivuar.
Ajo deklaroi se që prej vitit 2004 kur kishte nisur detyrën kishte gjykuar bazuar në ligj, me përgjegjshmëri e profesionalizëm dhe se kishte treguar etikë. Hoxha sqaroi vështirësitë e saj për rritjen e dy fëmijëve e vetme dhe kërkoi që të gjykohej me objektivitet, pa ndikime nga komentet mediatike dhe politike. “Kërkoj që kërkesa e Inspektorit të rrëzohet”, tha ajo.
Përfaqësuesi ligjor i Hoxhës, Ardian Visha tha se priste reflektim nga Inspektori.
“Nuk është një detyrë partie, por duhet të jetë një proces i ligjshëm,” tha Visha dhe theksoi se gjeneza e shkeljeve të pretenduara është sulmi politik i kryer ndaj gjyqtares Hoxha.
Kryetarja e KLGj, Naureda Llagami i tërhoqi vëmendjen disa herë avokatit Visha gjatë fjalës së tij që të bazohej tek provat dhe tek argumentet ligjorë. “Ju lutem evitoni diskutimet për çështjet politike,” tha Llagami.
Pavarësisht kësaj, avokati Visha pohoi se sulmi i parë politik ndaj Hoxhës ishte kryer nga Ministrja e Drejtësisë që i kishte konsideruar vendimet e saj si skandaloz. “Më pas konsiderimi politik i kryeministrit si ‘monstër’ e kësaj gjyqtareje,” shtoi Visha.
Sipas avokatit Visha, në raport nuk gjendej kurrkund një fjalë të vetme lidhur me pasojën që kishte sjellë lirimi me kusht i dy të dënuarve.
“Lirimi i Ilir Pajës nuk ka asnjë shkelje. Rasti Billa ka shkelje lidhur me konsiderimin si paraburgim të dënimit në Mbretërinë e Bashkuar. Vendimarrja e seancës paraardhëse për rrëzimin e këresave tona ka qenë pjesë e subjektivizmit,”pretendoi avokati.
Inspektori i Lartë, Metani vuri në dukje se për të gjitha çështjet e ngritura nga pala mbrojtëse janë dhënë përgjigjet në raport.
“Faktet e paraqitura në media dhe nga Drejtoria e Burgjeve janë verifikuar duke hequr çdo anë subjektive. Të gjitha aktet gjenden në raport, por duket se avokati nuk e ka lexuar mirë,” tha Metani dhe shpjegoi se kishte deklaruar që në shkurt të vitit 2020 se prioritet i punës së institucionit që drejton do të ishin lirimet me kusht, sepse ishin problematike.
Këshilli i Lartë Gjyqësor u tërhoq dhe vendosi të shpallë vendimin më datë 17 mars, ora 10:00.
