Prokuroria e Përgjithshme ka gjetur se kryetari i Bashkisë së Mallakastrës, Qerim Ismailaj ka qenë i dënuar për “përleshje” në Greqi dhe i ka përcjellë KQZ-së rezultatet e verifikimit, për t’u shprehur për kufizimet e ligjit të dekriminalizimit.
Prokuroria e Përgjithshme i ka konfirmuar Komisionit Qendror të Zgjedhjeve, KQZ faktin se kryetari aktual i Bashkisë Mallakastër, Qerim Ismailaj, rezulton i dënuar me vendim të formës së prerë nga një gjykatë e huaj.
Verifikimi u krye pas denoncimit të Partisë Demokratike në janar të vitit 2020, me pretendimin se Ismailaj ishte dënuar për kryerjen e veprimeve të dhunshme në Greqi, por se nuk e ka vuajtur dënimin. “Sipas ligjit të dekriminalizimit, Qerim Ismailaj nuk mund të ushtrojë asnjë funksion publik, aq më pak të jetë kandidat për Kryetar Bashkie,” deklaroi atëherë sekretari i PD-së, Gazmend Bardhi duke e konsideruar Ismailajn subjekt ndalimi sipas ligjit të dekriminalizimit.
Këshilltarja për mediat pranë KQZ-së, Drilona Hoxhaj i tha për BIRN se vendimi i prokurorisë për rezultatet e verifikimit për Ismailajn sapo ka mbërritur dhe ende nuk ka një konkluzion në raport me ligjin për dekriminalizimin. Në vendimin e Prokurorisë së Përgjithshme thuhet se kryebashkiaku i Mallakastrës rezulton i dënuar me vendim të formës së prerë të vitit 2000 të Gjykatës së Përbërë nën Betim të Chios në Greqi.
Kjo gjykatë e ka shpallur fajtor dhe e ka dënuar në mungesë me 3 vite burgim Ismailajn për veprën penale të “Konfliktit” / “Përleshjes”, parashikuar nga neni 313 i Kodit Penal të Republikës së Greqisë – që në Shqipëri i korrespondon veprës penale “dëmtime të tjera me dashje”, parashikuar nga neni 90/1 të Kodit Penal, e cila parashikon dënim vetëm me gjobë.
Gjithashtu, në vendimin e prokurorisë thuhet se nga verifikimet ka rezultuar se Ismailaj nuk ka qenë ndonjëherë i dëbuar nga ndonjë autoritet i huaj si dhe nuk ka qenë i shpallur në kërkim ndërkombëtar.
Partia Demokratike ka denoncuar më herët edhe tre kryebashkiakë të tjerë socialistë, dy prej të cilëve janë detyruar të dorëhiqen nga postet për shkak të mosraportimit të problemeve të së shkuarës në formularin e dekriminalizimit.
I pari, Valdrin Pjetri, u detyrua të heqë dorë nga posti i kryebashkiakut të Shkodrës pasi fitoi zgjedhjet pa garë të qershorit 2019. Ai u dorëhoq pasi PD zbuloi një dënim të tij për drogë në Itali në vitin 2003. Por Gjykata e Tiranës pushoi hetimet ndaj tij, duke vlerësuar se mosdeklarimi i dënimit në Itali nuk përbënte vepër penale, pasi në dispozitiv thuhej se nuk duhej të përmendej në të ardhmen.
Agim Kajmaku, i cili u zgjodh kryebashkiak i Vorës për socialistët, u denoncua nga PD se nuk kishte deklaruar hetimin e kryer ndaj tij për falsifikim parash në Greqi. Kajmaku e humbi mandatin nga KQZ dhe u mor i pandehur nga Prokuroria për veprën penale të falsifikimit.
PD denoncoi edhe kryebashkiakun e Vaut të Dejës, Mark Babani si person të arrestuar për vjedhje në Sicili, por Babani i mohoi akuzat.
