Komisioneri Kundër Diskriminimit është shprehur i pakënaqur me punën e organit të akuzës në trajtimin e çështjeve të lidhura me gjuhën e urrejtjes.
Komisioneri Kundër Diskriminimit, Robert Gajda deklaroi të enjten se organi akuzës nuk po bën mjaftueshëm për të proceduar rastet e kallëzuara të gjuhës së urrejtjes.
“Akoma shohim sot që prokuroria nuk ka aktivizmin e duhur për ndjekjen e atyre personave që nëpërmjet komenteve në rrjetet sociale nxisin në mënyrë të pastër urrejtje dhe dhunë ekstreme ndaj disa personave të tjerë, thjeshtë sepse ato u përkasin grupeve të ndjeshme,” u shpreh Gajda.
Komentet e Gajdës u bënë gjatë prezantimit të studimit të Këshillit të Europës me titull “Përtej përkufizimeve: Thirrje kundër gjuhës së urrejtjes në Shqipëri.”
Ky studimi u realizua nga Mirela P. Bogdani, profesore në Fakultetin e Drejtësisë në Universitetin e Tiranës; Federico Falappo, profesor i Studimeve dhe Linguistikës Italiane në ‘Reading University’ në Mbretërinë e Bashkuar dhe psikologja Xheni Karaj, drejtuese e Aleancës Kundër Diskriminit të LGBTI.
Bogdani nënvizoi se gjykatat në Shqipëri shqyrtojnë kryesisht vetëm çështje të fyerjeve apo shpifjeve që kanë të bëjnë me persona të rëndësishëm siç janë politikanët, ndërsa njerëzit e thjeshtë gjejnë zgjidhje më të shpejtë tek organi i Komisionerit të Mbrojtjes nga Diskriminimi.
“Standartet ndërkombëtare, akoma nuk janë të implementuara 100% në praktikat e gjykatave shqiptare,” tha ajo.
Bogdani bëri thirrje që në lidhje dëmet jo-pasurore që mund të shkaktojë përdorimi i gjuhës së urrejtjes, është e rëndësishme miratimit i një programi të veçantë nga ana e organeve publike që ka në fokus dhënien e ndihmës dhe ndërgjegjësimin mbi të drejtat e tyre të viktimave të gjuhës së urrejtjes.
“Kjo është shumë e rëndësishme, sidomos sepse në praktiken gjyqësore shqiptare ende mungojnë proceset civile për shpërblimin e dëmit pasuror ose jopasuror të shkaktuar nga përdorimi i gjuhës së urrejtjes,” theksoi ajo.
Sipas studimit të bazuar në 1500 të anketuar ky fenomen negativ është i gjithëpërhapur në vend. Më shumë se 9 në 10 të anketuar mendojnë se gjuha e urrejtjes është shumë e përhapur, kryesisht tek grupet e ndjeshme.
Në Shqipëri, rreth 58% e popullsisë shprehen se janë të informuar se çfarë është gjuha e urrejtjes, ndërsa 6% e tyre thonë se nuk janë në dijeni të domethënies së këtij termi.
“Është e rëndësishme për njerëzit që të kuptojnë dhe informohen se kanë të drejta, dhe mbi të gjitha se ku mund t’i kërkojnë këto të drejta,” tha Federico Faloppa.
Sipas studimit kanalet kryesore për të kërkuar ndihmë në raste të gjuhës së urrejtjes raportohet se janë familja dhe miqtë (55%), ndjekur nga mjeku ose psikologu (25%), e më pas zyrtarët policorë (24%).
“Personalisht kam 12 vite që hasem me rezistencë, por duhet të pranoj se vitin e fundit gjuha e urrejtjes është bërë më e dhunshme se kurrë,” tha Xheni Karaj.
“Kjo ka pasoja për shëndetin mendor dhe fizik të personave të prekur nga ky fenomen,” përfundoi ajo.
