Shpenzimet mujore të studentëve rezultojnë mjaft të larta në krahasim me të ardhurat e tyre, duke u kthyer në një sfidë për përballimin e jetesës.
Një anketim i kryer prej organizatës “Qëndresa Qytetare” tregoi se studentët në kryeqytet shpenzojnë mesatarisht 324 Euro në muaj, ku përqindjen më të madhe të shpenzimeve e zënë ushqimi dhe akomodimi, ndjekur nga mjetet mësimore, transporti dhe nevojat për argëtim.
Anketa iu shpërnda 775 studentëve në 5 universitete publike kryesore të Tiranës.
Duket parë shpenzimet e tyre mesatare mujore, situata financiare e studentëve krahasuar me pagat mesatare në Shqipëri, nuk duket se i favorizon për një të ardhme të sigurt.
“55,7% e studentëve që punojnë rezultojnë me një rrogë mesatare 200 Euro. 24,6% e tyre marrin një rrogë 300 Euro, dhe vetëm 4,5% e tyre marrin mbi 300 Euro”, vëren sondazhi I kryer nga Qëndresa Qytetare, ndërkohë që shpenzimet e tyre e kalojnë shumën prej 300 Eurosh.
Të pyetur se nga i sigurojnë të ardhurat kryesore për të përballuar jetesën, më shumë se gjysma e studentëve janë përgjigjur se familja ua siguron mbulimin e shpenzimeve (53.8%).
Vetëm 7,5% e tyre i mbulojnë shpenzimet vetë.
Në vitin 2022, Tirana do të marrë titullin Kryeqyteti Europian i Rinisë, por për shumë të rinj të dhënat e sondazhit tregojnë se jetesa është e vështirë.
“Shqetësimi kryesor është rritja e çmimit të banesave me qira, mungesa e konvikteve, si edhe jo efektiviteti i politikave të ndërrmara si për shembull karta e studentit”, i tha BIRN Rigels Xhemollari, drejtor ekzekutiv i “Qëndresa Qytetare”.
59% e studentëve në kryeqytet jetojnë në banesa me qira, 20 % në konvikt dhe 21% në banesën e familjes së tyre.
Një pjesë e mirë e tyre të cilët jetojnë me qira apo në konvikte shpenzojnë 50-200 Euro për akomodimin në kryeqytet, ndërsa për ushqimin rreth 60% e studentëve japin deri në 7 Euro në ditë, pra rreth 210 Euro në muaj.
“Drejtoritë e konvikteve në Tiranë akomodojnë vetëm 7% të totalit të studentëve të kryeqytetit. Nga 78,500 studentë, vetëm 5,549 mund të sigurojnë një shtrat në konvikt”, vëren sondazhi.
Një tjetër shpenzim që atyre u duhet të mbulojnë, është edhe udhëtimi brënda apo jashtë kryeqytetit i cili kryesisht bëhet nëpërmjet transportit publik.
“Shpenzimet mujore të transportit arrijnë deri në 10 Euro për 39,4% të studentëve, dhe deri në 30 Euro për 42,5% të tyre”, tregojnë rezultatet e anketës.
