Dy specialistë IT të punësuar pranë Agjencisë Kombëtare të Shërbimeve të Informacionit, AKSHI dhe dy persona në sektorin privat u arrestuan të premten për skandalin e nxjerrjes së të dhënave personale dhe sensitive të gati 700 mjë qytetarëve shqiptarë. Arrestimi i tyre u bë i ditur nga drejtuesja e Prokurorisë së Tiranës, Elisabeta Imeraj, gjatë një konference për mediat bashkë me drejtues të Policisë së Shtetit.
Imeraj tha se databazat e pagave janë bërë objekt shitje-blerje nga persona që punojnë në sektorin privat, por ajo shtoi se po vijojnë hetimet për të zbuluar qëllimin e përdorimit të tyre.
“Kemi arritur të konkludojmë në një dyshim të arsyeshëm e si rezultat të hetimit paraprak kemi identifikuar 4 autorë,” tha Imeraj.
“Punonjësi i IT në Drejtorinë e Përgjithshme të Tatimeve, e cila është e punësuar tek AKSHI, duke pasur aksesin në të dhënat personale në pagat e disa muajve, ka hyrë duke marrë këto të dhëna dhe këto të dhëna i ka shpërndarë te kolegu i saj, i cili ka shfrytëzuar këto të dhëna dhe ia ka shitur subjekteve private. Pra nuk kemi të bëjmë me ndërhyrje në rrjetin kompjuterik, por punonjës të caktuar kanë shpërdoruar detyrën me veprimet e tyre dhe të dhënat e siguruara i kanë shitur në subjekte private,” tha Imeraj.
Ajo zbuloi se dy personat e tjerë të arrestuar punojnë në fushën e përmbarimit, duke shtuar se “këto të dhëna i kanë përdorur për qëllimet e tyre tyre të punës, apo dhe për qëllime të tjera”.
Drejtuesja e prokurorisë tha se për këtë çështje hetimi vijon pasi “prokuroria po heton, jo vetëm mekanizmin e ngjarjes, evidentimin e autorëve që kanë pasur akses dhe këto të dhënë i kanë shitur tek persona të tjerë, por edhe për qëllimin e përdorimit të këtyre të dhënave”.
Gjithashtu Imeraj bëri të ditur se vijojnë hetimet në Drejtorinë e Transportit, pasi një tjetër skandal shoqëroi nxjerrjen e të dhënave për pagat, me rrjedhjen e të dhënave personale të targave të automjeteve.
Në fund të vitit të kaluar, një databazë me të dhënat personale dhe sensitive të 637,183 qytetarëve u shpërnda në seri përmes aplikacionit “Ëhatsapp”, duke shënuar rrjedhjen më të madhe të të dhënave zyrtare në Shqipëri. Databaza përmban numrat personalë, emrat, subjektet punëdhënëse si dhe pagën mujore të të gjithë personave të regjistruar si të punësuar në sektorin publik dhe atë privat në Shqipëri.
