Nëpër rrugicat e fundit të rrugës “5 Maji”, një tjetër mëngjes i trishtë erdhi për banorët e 11 shtëpive që ishin shenjestra e rradhës e Institutit Kombëtar të Mbrojtjes së Territorit (IKMT).
Kordoni i Policisë Bashkiake të shoqëruar prej forcave Shqiponja dhe FNSH, si çdo herë tjetër nuk lejouan asnjë hyrje-dalje në zonë, qoftë për banorët apo gazetarët.
Banorët e dëshpëruar kërkuan drejtësi, ku një prej tyre humbi ndjenjat dhe si pasojë u shoqërua me ambulancë në QSUT.
“Na keni kthyer 32 vite mbrapa”, tha për mediat një banor, duke iu referuar kohës kur ata ndërtuan shtëpinë e tyre prej themeleve.
E dëshpëruar, një tjetër banore e zonës ulerinte për ndihmë, pasi vëllai i saj i ndodhur brënda banesës nuk ndihej mirë dhe kishtë nevojë për ndihmë mjekësore.
“Ku janë këta pushtetarë, ku janë…. se jam t’u vdek”, bërtiste gruaja duke ngritur duart drejt forcave policore në shenjë revolte.
Aksioni i IMT-së më datë 9 Shkurt filloi rreth orës 7 të mëngjesit, duke përfunduar në orën 12.30.
Njëmbëdhjetë ndërtesa u shembën të mërkurën, ndërsa plani i rindërtimit parashikon shembjen e 430 shtëpive.
Dhjetra familje preken nga shpronësimet që po kryen qeveria shqiptare për të ndërtuar një lagje të re me pallate në rrugën ‘5 Maji’ në Tiranë. E projektuar nga arkitekti italian Stefano Boeri, lagjja e re do të ketë 3,500 apartamente dhe do të strehojë 11 mijë banorë.
Nëpërmjet një vendimi të marrë nga Këshilli i Ministrave me 22 shtator, qeveria i ka ofruar banorëve të zonës që preken nga projekti ‘kompensimit me shkëmbim’ të pronave ekzistuese me apartamente të reja që priten të ndërtohen. Bashkia gjithashtu i ka ofruar banorëve bonus qiraje derisa apartamentet e reja të përfundojnë.
Megjithatë, shumë familje që preken nga shpronësimet në lagjen ‘5 Maji’ e kanë kundërshtuar ofertën e qeverisë. Sipas tyre bashkia u ka ofrur një bonus qiraje që është tepër i ulët. Ata ankohen gjithashtu se marrëveshja për kompensim me shkëmbim është fiktive, pa një plan konkret dhe një afat kohor real për kompensim.
“Une kam 3 muaj që e kam liruar shtëpinë. C’të bëj, nuk merrem dot me shtetin”, tha një grua e cila vetëm pasi policia hapi kordonin e sigurisë u lejua të shkojë për të ruajtur rrënojat e shtëpisë së saj prej fëmijëve që silleshin rrotull për të marrë nga rrënojat disa hekura për skrap.
“Largohuni tutje. Kjo është shtëpia ime”, u drejtohej ajo personave që afroheshin për skrap, e dëshpëruar sepse nuk arrinte të pranonte që tashmë asgjë nuk kishte mbetur prej shtëpisë së saj për t’u ruajtur.
Pak më tutje, qëndronte i ulur mbi rrënojat e banesës një burrë rreth të 40-tave, së bashku me djalin e tij të mitur.
“Tani po rri tek shtëpia e vëllait pak më poshtë. S’kam pranuar bonus qiraje. Bonusi i qirasë është për banorët e tërmetit, jo për ne që jemi pronarë të këtyre shtëpive prej 30 vjetësh”, tha ai me gjysëm zëri për BIRN.
