Në një njoftim për shtyp të shpërndarë rreth orës 23.00 të mbrëmjes së të mërkurës Gjykata Kushtetuese njoftoi se kishte shfuqizuar vendimin e parlamentit për shkarkimin e Presidentit Ilir Meta.
“Shfuqizimin e vendimit nr. 55/2021, datë 09.06.2021 të Kuvendit të Shqipërisë “Për shkarkimin e Presidentit të Republikës së Shqipërisë për shkelje të rënda të Kushtetutës”, thuhet në vendimin e bërë publik në faqen e gjykatës.
Në arsyetimin e shkurtër bashkëlidhur këtij njoftimi Gjykata Kushtetuese thotë se “Faktet e paraqitura si shkelje të nenit 86, pika 1, dhe nenit 89 të Kushtetutës, nuk përbëjnë shkelje të rënda të Kushtetutës”. Njësoj gjykata rrëzoi pretendimet për shkelje të dy neneve të tjera. Sipas njoftimit: “Faktet që lidhen me të drejtat në procesin zgjedhor nuk përbëjnë shkelje të rënda të Kushtetutës. Faktet që lidhen me marrëdhëniet me partnerët strategjikë nuk përbëjnë shkelje të Kushtetutës. Faktet e paraqitura si shkelje që lidhen me pavarësinë e organeve publike nuk përbëjnë shkelje të Kushtetutës. Faktet e paraqitura si shkelje të rendit dhe sigurisë publike nuk përbëjnë shkelje të Kushtetutës”.
Në njoftim nuk bëhet me dije nëse vendimi është unanim apo me mendim pakice. Gjykata po ashtu thotë se rrëzoi pretendimet e presidentit sa i përket shkeljeve proceduriale, duke e cilësuar kushtetuese procedurën e ndjekur nga Kuvendi.
Vendimi i shfuqizuar u votua nga legjislatura e kaluar e Kuvendit e kontrolluar thuajse plotësisht nga socialistët. Shumica, përfshi të ashtuquajturit deputetë të opozitës së re që u futën në parlament pas braktisjes së tij nga opozita, votoi më 9 qershor 2021 një raport që e gjeti Presidentin Ilir Meta fajtor për shkelje të rënda të kushtetutës. Socialistët pretenduan se deklaratat e Metës gjatë fushatës elektorale si njëanshmëri, ndërsa disa intervista të tij u cilësuan si të rrezikshme dhe se kishin cënuar marrëdhëniet e Shqipërisë me SHBA. Por Gjykata Kushtetuese arsyeton se nuk ka shkelje të rënda që do të çonin në shkarkim të presidentit.
