Kjo kërkesë e inicuar nga ish-kryeministri Sali Berisha dhe disa deputetë të Partisë demokratike nuk kishte gjetur dakordësi të mëkurën në Konferencën e Kryetareve për tu futur në rendin e ditës duke ia kaluar këtë vendimmarrje seancës plenare.
Berisha duke mbrojtur këtë këresë tha në Kuvend se njohja e gjenocidit në Srebrenicë është një akt që nderon 8 mijë viktimat e këtij gjenocidi dhe akuzoi presidentin aktual serb si arkitekt të tij.
“Udhëheqësit aktual me në krye Aleksandër Vuçiç janë arkitektë të këtij gjenocidi,” tha ai. Sipas tij rezoluta do të detyrojë Serbinë që të njohë krimet e saj.
Por kreu i grupit parlamentar të socialistëve, Taulant Balla, tha se mazhoranca do të votonte kundër kësaj kërkese pasi ishte inicuar nga Berisha, duke e akuzuar ate se kur ishte president i vendit ka lejuar furnizimin e makinerisë së luftës në Bosnjë. Balla tha se Kuvendi e ka dënuar dhe do ta dënojë sërish këtë gjenocid duke propozuar që më 11 korrik të ketë një seancë përkujtimore.
“Gjenocidi serb, nga ushtria jugosllave është ushqyer me naftën prej teje.” i tha ai Berishës duke cituar një raport të gazetës New York Times më 25 prill të 1995, 3 muaj para tragjedisë së Srebrenicës.
“Ne e dënojmë gjenocidin në Srebrenicë, por jo të lëmë që iniciativën për të bërë rezolutë për këtë ta marrësh ti”- shtoi ai.
Pas votimit të hapur ku deputetët e PS-së në pushtet e rrëzuan kërkesën Berisha akuzoi mazhorancën se kishte votuar sipas urdhërave të presidentit serb.
“Sali Berisha në Shqipëri dhe OKB ka qenë kundër embargos që penalizonte Kosovës dhe ka marrë çdo masë kundër kontrabandës”, iu përgjigj ai Ballës.
Rezoluta e publikuar nga deputeti Tritan Shehu parashikonte dënimin gjenocidin e ushtrisë serbe të Bosnjes në Srebrenicë dhe shpalljen e 11 korrikut si ditë përkujtimore për viktimat e këtij gjenocidi.
