Komisioni i Posaçëm Parlamentar për rolin e Kuvendit në procesin e Integrimit në Bashkimin Europian organizoi të hënën një seancë dëgjimore me shoqërinë civile dhe grupet e tjera të interesit.
Përfaqësuesit e shoqërisë civile dhanë sugjerimet e tyre për ndryshimet në ligjin e vitit 2015 “Për rolin e Kuvendit në procesin e Integrimit të Republikës së Shqipërisë në Bashkimin Europian” duke kërkuar që legjislativi të jetë më aktiv në fazën ku ndodhet procesi.
Organizatat e pranishme kërkuan që të forcohen dy strukturat që ka sot Kuvendi për të mbikëqyrur punën e ekzekutivit në negociata, Komisionin Parlamentar për Integrimin dhe Këshillin Kombëtar për Integrimin Europian (KKIE), si dhe të përfshihet në mënyrë aktive shoqëria civile dhe grupet e interesit në këtë proces.
Erida Skëndaj, drejtoreshë Ekzekutive e Komitetit Shqiptar të Helsinkit, bëri disa sugjerime konkrete për ndryshimet në ligj.
“Të rishikohet objekti i ligjit, që të mos ndalet te marrëdhënia që Kuvendi ka me Këshillin e Ministrave dhe institucionet e BE-së , por të përfshihen dhe aktorë të tjerë të sferës akadamike, shoqërisë civile, biznesit, në këtë proces bashkëpunues e koordinues,” tha ajo.
Sipas Skëndajt, nëse kjo merret parasysh duhet të parashikohet në fushëveprimin e ligjit.
Gjithashtu, ajo kërkoi që KKIE duhet të ketë rol më të fortë, jo vetëm këshillimor, siç e ka tani dhe që Kuvendi të ketë detyrat e qarta dhe të ndara nga qeveria.
“Në funksion të ndarjes dhe balancimit të pushteteve, detyrat që i takojnë Kuvendit duhet të miratohen paraprakisht nga strukturat e Kuvendit dhe jo të parashtrohen si detyra nga ekzekutivi,” tha ajo duke iu referuar Planit Kombëtar të Integrimit, një dokument i qeverisë që diskutohet dhe miratohet me rezolutë në seancë plenare.
Gjergji Vurmo, drejtor programi pranë IDM-së këmbënguli në gjetjen e instrumenteve ligjore për përfshirjen e grupeve të interesit në procesin e negociatave.
“Në këtë fazë të integrimit është e nevojshme që Kuvendi dhe sidomos qeveria të konsolidojë dhe të shtrijë bashkëpunimin me grupe interesi përtej shoqërisë civile,” tha ai, duke kërkuar forcimin e kapaciteteve të tyre.
“Ata do të paguajnë kostot për përafrimin e legjislacionit dhe zbatimin e tij,” shtoi Vurmo.
Ndërsa për zgjerimin e rolit të Kuvendit në proces, Vurmo tha se kjo nuk bëhet vetëm me ligj.
“Sa larg jeni ju të gatshëm të shkoni me zgjerimin e rolit të Kuvendit në kuadër të procesit të integrimit?”- pyeti ai deputetët.
“Shohim 360 ditë që Kuvendi dominohet nga ekzekutivi,” shtoi Vurmo, duke propozuar që Kuvendi të ridimensionojë rolin e komisionit parlamentar për integrimin dhe të KKIE-së.
Një detajim konkret të rolit mbikqyrës të Kuvendit në procesin e negociatave e mbështeti dhe Blerina Raca, menaxhere Programi e projektit të GIZ-it që mbështet përgatitjen për negociatat në katër fusha të politikave të “Acquis” të BE-së.
Bashkëkryetarët e komisionit, Jorida Tabaku nga PD dhe Taulant Balla nga PS, ranë dakord për nevojën e forcimit të rolit të Kuvendit në proces pas fillimit të bisedimeve.
Balla tha se Kushtetuta i parashikon Kuvendit një rol udhëheqës edhe pse procesi teknik drejtohet nga qeveria.
“Por negociatat janë proces legjislativ,” tha ai, duke raportuar për nisjen e përgatitjeve që po bën Kuvendi për rritjen e kapaciteteve në strukturën administrative.
Ndërsa Tabaku shprehu nevojën për përfshirjen në proces të pushtetit lokal, i cili zbaton mbi 80 % të legjislacionit, si dhe theksoi nevojën që procesi i integrimit të bëhet një proces i prekshëm dhe i kuptueshëm për qytetarët.
Përfaqësuesit politikë pranuan se procesi i integrimit duhet të jetë gjithpërfshirës dhe parashikuan një tjetër seancë dëgjimore me aktorët e shoqërisë civile për të diskutuar raportin e komisionit të posaçëm.
