Gjykata e Posaçme Kundër Korrupsionit dhe Krimit të Organizuar shpalli fajtor shtetasin iranian Bijan Pooladrag, për akuzën e veprimeve financiare me persona apo organizata të lidhur me terrorizmin dhe për pjesëmarrje në organizatë terroriste.
Gjykata e dënoi Pooladrag me 5 vjet burg për akuzën e parë dhe 10 vjet burg për të dytën, por sqaroi se me bashkim të dënimeve dhe zbatim të gjykimit të shkurtuar ai do të dënohej në total me 10 vjet burg. Pooladrag u shpall i pafajshëm për 4 akuza të tjera që kishin të bënin me ndërhyrje në sistemet kompjuterike dhe përgjim.
“Gjykata vendosi : Deklarimin fajtor të të pandehurit Bijan Pooladrag për veprën penale “Kryerja e shërbimeve dhe veprimeve me persona të shpallur’’, parashikuar nga neni 230/ç të Kodit Penal dhe dënimin e tij me 5 (pesë) vjet burgim. Deklarimin fajtor të të pandehurit Bijan Pooladrag për veprën penale “Organizata Terroriste’’, parashikuar nga neni 234/a, paragrafi i dytë të Kodit Penal dhe dënimin e tij me 10 (dhjetë) vjet burgim”, thuhet në njoftimin e GJKKO-së.
Iraniani Bijan Pooladrag u arrestua në tetor 2020 i akuzuar se ka kryer shërbime për personat e shpallur si “organizata terroriste” si dhe ka kryer përgjime të paligjshme. Ai dyshohej se ishte një agjent iranian me mision për të vrojtuar grupin e MEK, një organizatë opozitare iraniane në ekzil, e cila ka selinë aktualisht në Shqipëri pas evakuimit nga Iraku me ndërmjetësimin e amerikanëve.
Organizata e Popullit Muhaxhidin të Iranit është themeluar në vitet ’70 si një opozitë e majtë ndaj regjimit të mullahëve. Organizata u zhvendos në Irak gjatë Luftës Irak – Iran dhe u klasifikua si organizatë terroriste. Ajo u çarmatos pas pushtimit amerikan të Irakut ndërsa një pjesë e anëtarëve u zhvendosën në Shqipëri me ndërmjetësimin e amerikanëve.
Policia e Shtetit njoftoi në vitin 2019 se kishte dyshime se persona të agjenturës iraniane kishin përgatitur ndërmarrjen e sulmeve terroriste në territorin e Shqipërisë.
Situata mes Iranit dhe Shqipërisë u përkeqësua në vijim pas arrestimit të Pooladrag. Hakera, që dyshohet se janë të lidhura me shërbimet sekrete Iraniane, sulmuan sistemet elektronike shqiptare dhe e-albania në korrik të këtij viti dhe prej muajsh publikojnë të dhëna që pretendohet se janë marrë nga databaza qeveritare dhe emaile të zyrtarëve. Në shtator të këtij viti qeveria vendosi ndërprerjen e marrëdhënieve diplomatike me Iranin, të cilin e fajëson për sulmin. Ministria e Jashtme e Iranit e ka mohuar sulmin dhe i ka cilësuar akuzat e Shqipërisë si të “pabaza”.
