Komisioni i Posaçëm i Reformës Zgjedhore nuk arriti konsensus për ndryshime në Kodin Zgjedhor, edhe pse opozita erdhi me një projektligj me disa propozime konkrete në mbledhjen e së premtes.
Eksperti i Partisë Demokratike, Indrit Sefa, propozoi një sërë ndryshimesh që kërkonin aplikim në zgjedhjet lokale që mbahen në 14 maj të vitit që vjen.
Propozimet konsistonin në disa ndryshime që lidheshin me monitorimin e reklamave në media gjatë fushatës zgjedhore, mënyrës së votimit për listat e kandidatëve për këshilltarë dhe masa më të rrepta për përdorimin e fondeve publike për fushatë.
Sipas paketës ligjore në zgjedhjet vendore partitë duhet të konkurojnë me lista të hapura për këshillat bashkiakë. Sipas PD-së këshilltarët duhet të zgjidhen me votë parapëlqyese, kandidatët që marrin më shumë vota nga elektorati, ndryshe nga ç’është aktualisht që listat për këshillat votohen nën siglën e partive politike.
Eksperti tha se kjo është në frymën e ndryshimeve kushtetuese të bëra në verën e 2020-ës kur u vendos për votën parapëlqyese në zgjedhjet parlamentare.
“Ku zgjidhet me votë nga qytetarët do t’i shërbejë elektoratit, nuk do të votojë sipas urdhërit të partisë”- tha bashkëkryetari demokrat i komisionit, Enkelejd Alibeaj.
Për ndalimin e prokurimeve dhe i punësimeve në administratë para fushatës zgjedhore, sipas PD-së, duhet vendosur një afat i ri ligjor duke nisur nga data e dekretimit të zgjedhjeve nga presidenti dhe jo 4 muaj para datës së zgjedhjeve, siç është aktualisht.
Monitorimi i reklamave në media për fushatë zgjedhore përfshihet gjithashtu në projektin e PD-së, ku kërkohet që përveç televizioneve të monitorohen dhe platformat online dhe të ketë një ndarje të barabartë për mazhorancën dhe opozitën.
Alibeaj i mbrojti propozimet duke thënë se ishin në frymën e rekomandimeve të OSBE-ODIHR dhe rregullonin mangësitë dhe problematikat e hasura në zgjedhjet e fundit.
Bashkëkryetari socialist i komisonit, Damian Gjiknuri, i cilësoi propozimet të pamundura për tu realizuar teknikisht ose jo të arsyeshme.
“Të ndalosh aktivitetin normal të shtetit pse kemi zgjedhje, është e papranueshme”- tha ai lidhur me ndalimin e prokurimeve publike.
Po ashtu ai cilësoi konfuzuese dhe të parealizueshme votimin parapëlqyes për kandidatët për këshilltarë.
“Si mund të bëjmë fletë votimi që do të përfshijnë dhjetra emra kandidatësh nga 10 a më shumë parti”- tha ai.
Për monitorimin e mediave online, Gjiknuri vlerësoi propozimet, por tha se ishte e pamundur për t’i monitoruar.
“Është e vërtetë që mediat sociale janë kthyer në media influencuese, por është e vështirë dhe nuk di nëse Shqipëria ka kapacitete ligjore për t’i monitoruar”- tha Gjiknuri.
Mbledhja përfundoi pa rezultat pasi PS-ja nuk pranoi të votonte për propozimet e PD-së, ndërsa hedhja në votë në mënyrë të njëanshme nga Alibeaj mori vetëm 3 vota pro. Gjiknuri kërkoi që propozimet ligjore të vijnë si pasojë e një konsensusi politik dhe të konsultohen më parë me ekspertët ndërkombëtarë.
Komisioni i ngritur që në muajin shkurt nuk ka arritur të prodhojë rezultate konkrete në ato pak mbledhje që ka zhvilluar edhe pas zgjatjes së mandatit të tij në shtator.
