Prokuroria e Posaçme njoftoi të premten se veç 7 të akuzuarve për rrëmbimin dhe zhdukjen e Jan Prengës, për shkak të një mosmarrëveshje në trafikun e narkotikëve, do të dërgohej për gjykim me të njëjtën akuzë edhe Altin Hajri.
“I pandehuri Altin Hajri, pronar i kompleksit “Golden” ndodhur në Shijak akuzohet se është pjesëmarrës në grupin e strukturuar kriminal që ka kryer rrëmbimin e shtetasit Jan Prenga, ngjarje e ndodhur datën 17.01.2020 në Kamëz, Tiranë”, thuhet në njoftim.
Jan Prenga u rrëmbye dhe më pas dyshohet të jetë vrarë në janar 2020. Hetimet e prokurorisë e lidhën ngjarjen me kompleksin Golden, që sipas SPAK është në pronësi të Hajrit. Më herët në nëntor 2021 SPAK dërgoi për gjykim të pandehurit Dritan Rexhepi, Gentjan Funiqi, Martin Bleta, Korado Keshteja, Artan Doçaj, Aldo Majnishta dhe Geraldo Martini.
Hajri që ishte shpallur në kërkim për ngjarjen, nuk ishte në listën e të pandehurve dhe prokuroria tha atëherë se ndaj tij vijonin hetimet. Të premten megjithatë SPAK njoftoi se Hajri akuzohej tashmë për “Rrëmbim apo mbajtje peng e personit” me pasojë vdekjen, “Mbajtje pa leje e armëve luftarake”, “Fshehja dhe asgjësimi i kufomës”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Në nëntor 2020 SPAK sqaroi se nga hetimi kishte rezultuar se të pandehurit Dritan Rexhepi dhe Gentjan Funiqi (Doçaj) me precedentë penalë në fushën e narkotikëve, në fund të muajit dhjetor 2019 kanë urdhëruar rrëmbimin e viktimës Jani Prenga me banim në Kamëz. “Kjo, pasi sipas tyre, shtetasi Astrit Prenga, vëllai i viktimës ka vjedhur një sasi kokaine në Portin Portsmouth, Angli, që ju përkiste atyre, e cila ishte importuar nga Ekuadori në Angli“, pretendon SPAK.