Gjykata e Posaçme e Shkallës së Parë për Korrupsionin dhe Krimin e Organizuar caktoi të mërkurën më 15 nëntor tre ekspertë të rinj për të kryer analizën financiare së ish-anëtarit të Gjykatës Kushtetuese, Fatos Lulo, i akuzuar për fshehje të pasurive. Tre ekspertët e rinj, Valbona Kraja, Ismail Lleshi dhe Olti Visha kryen betimin dhe morën përsipër të kryejnë analizën fianciare bazuar në pyetjet e parashtruara nga prokurorja e çështjes, Doloreza Musabelliu dhe përfaqësuesi ligjor i Lulos, avokati Klodian Skënderi.
Gjykata përjashtoi më parë tre ekspertët kontabël, Albana Beqiri, Enida Skëndaj dhe Flamur Laho, të caktuar nga prokuroria, të cilët thanë gjatë seancës së 20 shtatorit se e kishin hartuar analizën financiare të Lulos bazuar në pyetjet e prokurores Musabelliu, analizë që u kontestua i pandehuri dhe avokati i tij. Pasi analiza financiare e paraqitur në seancën paraprake ishte hartuar nga këta tre ekspertë, gjykata vendosi që të pranojë kërkesën e mbrojtjes që të mos jenë të njëjtët që do të hartonin një analize të re gjatë shqyrtimit gjyqësor në themel. Rishikimi analizës u kërkua nga ekspertët e mëparshëm, të cilët pas konstatimeve të avokatit Skënderi, pranuan se mund të kishte lapsuse që duhej të trajtoheshin.
Prokurorja Doloreza Musabelliu u kërkoi tre ekspertëve të rinj që analizën ta kryenin deri në momentin e blerjes apo dhurimit të pasurive nga motra e të pandehurit – një vlere 100 mijë euro dhe një njësie që sipas aktit të blerjes ka pasur çmimin 120 mijë USD, ndërsa në hipotekë është regjistruar për shumën rreth 40 milionë lekë.
Prokurorja kërkoi që të konsiderohen të ardhura të ligjshme vetëm ato të cilat kanë origjinë të njohur. Nga të ardhurat e përfituara nga motra e të pandehurit prej dhënies së pronave me qira, prokuroria kërkoi që të konsiderohen vetëm ato për të cilat ajo zotëron certifikatë pronësie, si dhe të ardhurat për të cilat janë shlyer detyrimet tatimore.
Musabelliu u kërkoi ekspertëve të përllogarisin nëse motra e Lulos ka pasur mundësi t’i dhurojë shumën 100 mijë euro, si dhe të kryhet përllogaritje e vlerës së njësisë së dhuruar sipas çmimit të referencës.
Gjykata pyeti eksperten Kraja nëse kishte lidhje mes ekspertimit financiar dhe vlerësimit të pronës. Pasi ekspertja deklaroi se nuk ka lidhje mes tyre, gjyqtarja Elsa Ulliri e rrëzoi kërkesën e prokurorisë për kryerjen e ekspertimit të vlerës së pasurisë së paluajtshme.
Avokati Skënderi kërkoi që analiza financiare të fillojë në vitin 2005, kohë kur Lulo është dekretuar në Gjykatën e Lartë. Ai e mbështeti kërkesën e tij në akuzën e ngritur për fshehje të pasurive të krijuara gjatë ushtrimit të detyrës. Po ashtu, Skënderi kërkoi që të përllogariten vlerat në llogaritë bankare të motrës së Lulos, nga momenti krijimit të tyre, deri kur janë investuar për njësinë dhe kur i është dhuruar shuma 100 mijë euro të vëllait. Lidhur me të ardhurat e motrës së të pandehurit nga qiradhëniet, Skënderi kërkoi që përllogaritja të kryhet bazuar në përcaktimin e qirasë mujore në kontratë dhe të periudhës që kanë zgjatur.
Në përfundim, gjykata vendosi që ekspertëve t’u jepet një kopje e fashikujve të dosjes penale dhe e shtyu seancën për më datë 20 dhjetor, në orën 11:00, për t’u dhënë kohën e mjaftueshme të kërkuar prej tyre për të hartuar analizën financiare bazuar në pyetjet e prokurorisë dhe të të pandehurit.
Ish-anëtari i Gjykatës Kushtetuese, Fatos Lulo ishte i pari që iu nënshtrua procesit të vetingut dhe gjithashtu i pari që humbi vendin e punës për shkak se Komisioni i Pavarur i Kualifikimit arriti në përfundimin se pasuria e tij qindramijëra euroshe nuk mund të justifikohej me burime të ligjshme. Ai u shkarkua nga detyra më 23 mars të vitit 2018.
Në maj të vitit 2020, SPAK regjistroi procedim penal ndaj ish- gjyqtarëve të Gjykatës Kushtetuese, Fatos Lulo e Bashkim Dedja, si dhe ndaj ish-gjyqtarit të Gjykatës së Lartë, Shkëlzen Selimi, për veprën penale “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Lulo, 57 vjeç, pati një karrierë të gjatë si jurist, avokat dhe gjyqtar. Ai rezultoi se kishte krijuar një pasuri me vlerë prej 92 milionë lekësh, nga të cilat 75 milionë pretendoi se i kishte krijuar përpara fillimit të detyrës si gjyqtar.
