Qendra për Mbrojtjen e të Drejtave të Fëmijëve në Shqipëri, CRCA, së bashku me Linjën Kombëtare për Internet të Sigurt për Fëmijët “iSigurt.al” prezantoi të mërkurën raportin e Sigurisë Kibernetike të Fëmijëve në Shqipëri për vitin 2023.
Ky raport bazohet në të dhëna të mbledhura që prej vitit 2015 nga CRCA dhe “iSigurt.al”, me një fokus kryesor të analizës për vitin që lamë pas.
Sipas raportit, bullizmi online i raportuar ka shënuar një rritje me 160% në krahasim me vitet e kaluara dhe përbën shqetësimin kryesor të abuzimit me fëmijët.
“Bulizmi online është incidenti më i raportuar nga fëmijët dhe adoleshentët, në rreth 35% të rasteve, të ndjekur në 21% të rasteve nga gjuha e urrejtjes dhe 15% shantazhe dhe kërcënime online,” tha Borjana Dine, psikologe pranë CRCA.
Gjatë vitit 2023, pranë platformës iSIGURT.al janë bërë 244 raportime të incidenteve të ndeshura online nga fëmijët apo prindër, mësues, kujdestarë të tyre. Në ndryshim me vitin e kaluar, dhuna, ngacmimet dhe shfrytëzimi seksual online kanë kaluar në vend të katërt si incidente të raportuara.
Sipas ekspertëve të mbrojtjes së fëmijëve, një tjetër fakt shqetësues është se këtë vit ka raportime edhe nga fëmijë të moshës nën 11 vjeç, fenomen që nuk është vënë re në vitet e kaluara. Ekspertët ngritën alarmin dhe u bënë thirrje autoriteteve përgjegjëse për të marrë masa parandaluese për këto abuzime online.
“Autoriteti Kombëtar për Certifikimin Elektronik dhe Sigurinë Kibernetike AKCESK dhe Agjencia Shtetërore për Mbrojtjen e të Drejtave të Fëmijëve janë dy institucionet kryesore që duhet të ndërmarrin masa sa më të shpejta për mbrojtjen e fëmijëve, së bashku me shoqërinë civile dhe ekspertët në këtë fushë, për të ndërtuar një arkitekturë tërësisht të re ligjore dhe institucionale për mbrojtjen e fëmijëve dhe adoleshentëve në hapësirën kibernetike,” tha Altin Hazizaj, drejtues i qendrës CRCA.
Gjetjet e raportit vënë gjithashtu në pah se raportimet vijnë kryesisht nga vajzat, me 62% të rasteve të denoncuara.
“Për herë të parë vajzat po raportojnë thuajse dy herë më shumë se djemtë incidente gjatë navigimit të tyre online”, citojnë gjetjet e raportit.
Lidhur me platformat ku hasen shkeljet dhe incidentet e raportuara nga viktimat, TikTok dhe Instagram kryesojnë listën e raportimeve, respektivisht me 47% dhe 27% të rasteve.
