Gjyqtarja e Tiranës Arnisa Këlliçi akuzohet nga Prokuroria e Tiranës se bëri kallëzim të rreme dhe se kishte shkruar vetë një letër kërcënuese që u përdor si provë në Këshillin e Lartë Gjyqësor për t’i dhënë asaj dhe familjes mbrojtje fizike.
Në një njoftim për mediat të ndarë nga Prokuroria e Përgjithshme të mërkurën bëhet me dije se pas hetimit të rastit të denoncuar në 20 janar nga Këlliçi, prokuria e Tiranës e gjeti pretendimin e gjyqtares të rremë.
“Në përfundim është arritur në konkluzionin, referuar rrethanave dhe aktit të ekspertimit grafik, se letra objekt hetimi, është shkruar nga vetë kallëzuesja shtetasja A. K.”, njofton prokuroria.
Sipas prokurorisë së Tiranës pas këtij rezultati ndaj Këlliçit është ngritur akuza e kallëzimit të rremë. “Në këto kushte, nga ana e organit të prokurorisë është çmuar, se ka prova që krijojnë dyshim e arsyeshëm për t’i atribuuar kësaj shtetaseje veprën penale të “Kallëzimit të rreme” parashikuar nga neni 305 i Kodit Penal, duke proceduar me marrjen si të pandehur për këtë vepër penale”, thuhet në njoftim.
Për shkak se letra u përdor për të përfituar mbrojtje nga Këshilli i Lartë Gjyqësor prokuroria po ashtu ka ngritur akuzën e “falsifikimit të dokumenteve” ndaj gjyqtares. Prokuroria po ashtu njoftoi kalimin e çështjes për kompetencë në prokurorinë e Durrësit.
E pyetur nga BIRN Këlliçi e kundërshtoi akuzën. Ajo tha në një bisedë telefonike se akuza ndaj saj “është një sajesë”, ndërsa fajësoi prokurorinë e Tiranës se po mbronte kërcënuesin që sipas saj është prokuror në këtë prokurori.
Këlliçi akuzoi me emra një ish-gjyqtar, prokuroren e çështjes, drejtuesin e prokurorisë së Tiranës si të përfshirë. Ajo po ashtu pretendoi se kërcënuesi ishte një prokuror dhe se ky i fundit kishte kërcënuar atë dhe kancelarin e gjykatës. Ajo tha se nuk kishte arsye për të bërë kallëzim të rremë, ndërsa kundërshtoi ekspertizën dhe tha se shkrimi në letrën kërcënuese nuk ishte i saji.
Këshilli i Lartë Gjyqësor njoftoi të mërkurën pas një mbledhje me urgjencë se vendosi pezullimin nga detyra të Këlliçit, për shkak të hetimit ndaj saj.
