Bazuar në një udhëzim publik të kryeministrit Edi Rama, anëtarët e Partisë Socialiste në Këshillin Bashkiak të Tiranës, në mënyrë të pazakontë, u mblodhën të mërkurën në selinë e partisë dhe jo në atë të bashkisë, për të nisur procedurën e shkarkimit të kryebashkiakut socialist Erion Veliaj, i cili gjendet në burg me akuzat për korrupsion dhe pastrim parash.
Të enjten ata dorëzuan një projektvendim që pritet të votohet në mbledhjen e datës 23 shtator.
Në relacionin shoqërues të këtij projektvendimi argumentohet se shkarkimi nga detyra nuk është një “fajësim” i tij për akuzat që i janë bërë, por një nevojë për drejtimin e bashkisë, ndërsa ligjërisht bazohet në Ligjin për Vetëqeverisjen Vendore, që parashikon procedurë shkarkimi për mungesë më shumë se 3 muaj në detyrë.
Këshilltarët e PS-së pretendojnë se me anë të kësaj kërkese po “ngrihen në nivelin që qytetarët e Tiranës presin nga të zgjedhurit e tyre, atë të marrjes së vendimeve dhe dhënien e zgjidhjeve në dobi të interesit publik dhe atij qytetar”.
Veliaj kundërshtoi kërkesën për shkarkim nga partia e tij dhe, nëpërmjet një letre të shpërndarë në media të premten, ai e cilësoi procesin si “antikushtetues”.
“E mirëkuptoj shqetësimin tuaj për të kërkuar një zgjidhje politike. Por nuk mund të mirëkuptoj që kjo krizë, e shkaktuar nga gjykata dhe ku “viktimë” është vetëqeverisja vendore, të “zgjidhet” me një tjetër shkelje të Kushtetutës po nga vetë pushteti vendor”, shkruan Veliaj në letrën për këshilltarët socialistë.
Kryebashkiaku i Tiranës, një bashkëpunëtor i ngushtë i Ramës, i cili ndodhej në mandatin e tretë të tij, u arrestua më 10 shkurt nga Prokuroria e Posaçme, SPAK, me akuzat për krijimin e një skeme korruptive mes kompanive dhe OJF-ve të lidhura me bashkëshorten e tij, Ajola Xoxa, dhe një grupi biznesmenësh pranë tij. Më 10 shtator të këtij viti, SPAK dërgoi në gjyq Veliajn, Xoxën, ish-deputeten socialiste Klotilda Bushka dhe 15 persona të tjerë. Ndaj Veliajt janë ngritur 13 akuza, përfshi ato për korrupsion, pastrim parash dhe deri te mbajtja e sendeve të paligjshme në qeli gjatë paraburgimit.
Fill pas arrestimit, Rama refuzoi kategorikisht shkarkimin e tij nga detyra dhe sulmoi drejtësinë për arrestim të padrejtë.
“Jo vetëm kryetari i Bashkisë së Tiranës nuk do të shkarkohet nga detyra, por nga ndalimi i tij ka lindur për ne detyra që të vazhdojmë të jemi garantë të palëkundur të drejtësisë, duke nxitur sa më shumë transparencë për të dalë tek e vërteta,” tha Rama për BIRN më 11 shkurt.
Por, shtatë muaj më vonë, Rama tha se shkarkimi i tij ishte për të mirën e qytetit dhe, duke lajmëruar zgjedhje të reja për bashkinë, caktoi kandidate pasardhëse Ogerta Manastirliun, aktualisht deputete e Tiranës.
Shkarkimi i Veliajt ishte kërkuar më herët nga këshilltarët e opozitës në bashki me të njëjtin argument ligjor, por socialistët refuzuan ta fusin në rendin e ditës.
Procedura nis në Këshillin Bashkiak dhe përfundon në Këshillin e Ministrave, që merr vendimin përfundimtar për shkarkimin e Veliajt.
Avokati Marash Logu e sheh procedurën si të vonuar nga pikëpamja ligjore, por të nxitur nga arsye politike brenda partisë në pushtet. Sipas tij, ligji për vetëqeverisjen vendore e ka të sanksionuar mungesën 3-mujore në detyrë si arsye për të nisur procedurën, pa iu futur arsyeve të saj, ndryshe nga rasti i mandatit të deputetit, ku kërkohet “mungesë pa arsye” si motiv për ndërprerjen e mandatit.
“Duhet pasur parasysh fakti që një deputet është një nga 140 përfaqësuesit e popullit në Parlament, ndërsa kryetari i bashkisë është figurë unike që ndikon në gjithë mbarëvajtjen, organizimin dhe funksionimin e bashkisë”, i tha ai BIRN-it.
Logu, i cili ka përfaqësuar opozitën në përballjet ligjore, e quan gjithsesi kërkesën e këshilltarëve socialistë si “politike”, pasi afati juridik kërkonte që ky hap të ndërmerrej shumë kohë më parë.
“Kuptohet që në këtë rast jemi para një vendimmarrjeje politike për t’i dhënë fund karrierës politike të Erion Veliaj më shumë sesa e nxitur nga argumente juridike…”, thekson ai.
