Avokatët mbrojtës të ish-komandantit të Ushtrisë Serbe të Bosnjës, Ratko Mlladiç, po kërkojnë lirimin e tij të menjëhershëm për arsye humanitare pas një incidenti të rëndë shëndetësor që e ka afruar me vdekjen, sipas kërkesës së bërë publike të premten nga Mekanizmi Ndërkombëtar i Mbetur për Gjykatat Penale Ndërkombëtare në Hagë.
Kërkesa thotë se Mlladiçi, 84 vjeç, i cili po vuan një dënim me burgim të përjetshëm për gjenocid dhe krime të tjera lufte, “ndodhet në një gjendje të përparuar dhe të pakthyeshme përkeqësimi shëndetësor si rezultat i një incidenti mjekësor… dhe po i afrohet fundit të jetës së tij”.
Sipas dokumentit, Mlladiçi kohët e fundit pësoi një “episod akut neurologjik/mjekësor i karakterizuar nga afazi totale e papritur (pra, humbje e aftësisë për të folur) dhe vështirësi në gëlltitje gjatë një video-telefonate me djalin e tij (Darko), çka kërkoi shtrimin urgjent në spital”.
Mjekët që flasin serbisht dhe që e vizituan pas incidentit thanë se gjendja e tij është “serioze, kërcënuese për jetën (pra, rreziku i vdekjes së afërt është i lartë), dhe e tillë që nuk mund të trajtohet në mënyrë të përshtatshme në spitalin e burgut”, shtohet në kërkesë.
Avokatët e Mlladiçit po kërkojnë lirimin e tij të menjëhershëm me kushte ose përkohësisht në një spital të specializuar ose në një institucion kujdesi paliativ.
Gjenerali i Ushtrisë Serbe të Bosnjës u dënua me vendim përfundimtar në qershor 2021 për gjenocidin ndaj boshnjakëve në Srebrenicë, përndjekjen e boshnjakëve dhe kroatëve në mbarë vendin gjatë luftës së viteve 1992-1995 në Bosnje dhe Hercegovinë, terrorizimin e popullsisë së Sarajevës përmes një fushate bombardimesh dhe snajperësh gjatë rrethimit të qytetit, si dhe për marrjen peng të paqeruajtësve të OKB-së.
Gjatë kohës së tij në paraburgim në Holandë, Mlladiçi pasur disa probleme serioze shëndetësore dhe ka pësuar disa ishemi si dhe një atak në zemër.
Në qershor të vitit të kaluar, avokatët e tij gjithashtu kërkuan lirimin, duke thënë se atij i kishin mbetur vetëm disa muaj jetë. Gjykata e OKB-së e refuzoi kërkesën, duke pranuar se gjendja e tij ishte “e brishtë”, por duke këmbëngulur se ai po merr kujdes mjekësor cilësor në paraburgim në Holandë.
