Pas zbulimit të tre farmacive në qershor, prokuroria zbuloi edhe disa farmaci të tjera dhe një depo farmaceutike si të dyshuar për një skemë mashtrimi me fatura false për rimbursim nga Fondit të Kujdesit Shëndetësor.
Prokuroria e Tiranës urdhëroi ndalimin e 13 personave, urdhërarreste që u ekzekutuan nga policia mbrëmjen e të shtunës, mes të cilëve, pronarë dhe punonjës farmacish si dhe punonjës të Fondit të Kujdesit Shëndetësor pas hetimeve disamujore që zbuluan një skemë tjetër mashtrimi me fatura false ilaçesh.
Prokuroria tha se ka ndjekur gjurmët e dokumenteve të rimbursimit për ilaçin Ketosteril për të zbuluar se një kompani me emrin “Omega Farma Group” ka lëshuar përgjatë periudhës qershor 2013-maj 2015, fatura fiktive, të cilat, një rrjet farmacish i ka paraqitur për rimbursim te fondi.
Prokuroria zbuloi se disa farmaci në Tiranë patën deklaruar -hyrje të barit Ketosteril me furnitor “Omega Farma Group”, por në fakt, ky ilaç importohet nga një kompani tjetër farmaceutike. Prokurorët verifikuan se depoja farmaceutike “RF”, e cila kishte importuar këtë ilaç, nuk kishte bërë shitje te kompania “Omega Pharma Group”. Administratori i kësaj kompanie Nadir Çausholli dyshohet se ka qenë organizatori i skemës.
“Nga studimi në tërësi i materialeve të administruara në këtë procedim penal, ekziston dyshimi i arsyetuar në prova se personi nën hetim Nadir Çausholli ka kryer veprën penale të “Falsifikimit të dokumenteve” në bashkëpunim dhe “Mashtrimit” në bashkëpunim, parashikuar nga neni 186/2 dhe 143/2 i K. Penal,” thuhet në deklaratën e prokurorisë.
Prokuroria sqaron se- “objekti i hetimit fillimisht ka pasur të bëjë me rimbursimin e çmimeve të medikamenteve mjekësore, për sa i përket recetave të ekzekutuara pranë katër subjekteve farmaceutike, të cilët janë “Farmacia Lundër”, “Nutrimed 2012”, “Bërxhitë”, dhe “Adelina”, por gjatë hetimit u zbulua se edhe disa farmacive të tjera kanë përfituar vlera të larta rimbursimi për sa i përket medikamenteve mjekësore, çmimet e të cilave rimbursohen nga shteti.
Sipas skemës së zbardhur, Omega lëshonte fatura fiktive për shitje ilaçesh te rrjeti i farmacive ndërsa farmacitë dorëzonin fatura për rimbursim te Fondi.
Në skemën e tij të mashtrimit, sipas prokurorisë, Çausholli është mbështetur edhe nga shtetasit Fisnik Kollcaku (drejtues teknik i “Omega Pharma Group gjatë vitit 2014); Valbona Kraja (shefe e Financës pranë “Omega Pharma Group”); si edhe Arjola Pipera (punonjëse financiere pranë “Omega Pharma Group”)
Po ashtu, nga hetimi i Prokurorisë së Tiranës ka rezultuar se disa farmaci kanë ekzekutuar receta fiktive të marra nga “Omega Pharma” dhe më pas i kanë paraqitur këto receta pranë Fondit të Kujdesit Shëndetësor, me qëllim rimbursimi.
Për këto veprime të kundërligjshme, Prokuroria e Tiranës ka nxjerrë urdhra ndalimi edhe për shtetasit: Ela Malaj (drejtuese teknike e farmacisë “Alice”), Mariela Përnoci, Arbi Teqja dhe Arbër Thereska (përkatësisht administrator dhe drejtues teknikë të farmacisë “Express”), Erind Hajdari (drejtuese teknike e farmacisë “Farmacia nr.6 ”, Ornela Plepi (Administrator dhe drejtuese teknike e farmacisë “Katroshi”)
Nga hetimi ka rezultuar se farmacitë, janë ekzekutuar receta fiktive, të cilat më pas i kanë dorëzuar pranë Fondit me qëllim rimbursimi.
Prokuroria dyshon se shtetasja Violeta Bejko, në cilësinë e magazinieres së këtij institucioni, nuk ka administruar në mënyrën e duhur lëvizjen e materialeve të bëra hyrje në magazinë. Ajo nuk ka bërë shpërndarjen e recetave në përputhje me procedurën e rregullt ligjore.
Nga hetimi ka rezultuar gjithashtu se shtetasi Tasim Toci ka nënshkruar për “Sektorin e Inf.Statistikës” pa pasur asnjë tagër për të kryer këtë veprim.
Më 5 qershor 2015, Prokuroria e Tiranës arrestoi nëntë persona, mes të cilëve edhe drejtorin e FSDKSH së Tiranës, Pjerin Xhuvani për abuzime me fondin e ilaçeve të rimbursueshme.
Prokuroria hetoi një skemë mashtrimi me katër farmaci “fantazmë”, që përmes recetave të falsifikuara kishin përfituar rreth 56 milionë lekë nga Fondi i Kujdesit Shëndetësor.
Fondi i Kujdesit Shëndetësor është krijuar për të financuar mjekimin e shtresave në nevojë, pensionistët, fëmijët apo pacientë me sëmundje të rënda. Në raportin vjetor të FSDKSH thuhet se fondi i rimbursimeve për 2014 ishte 8.2 miliardë lekë, nga të cilat u shpenzuan 98 për qind.
Ky artikull është pjesë e një serie shkrimesh mbi prokurimin publik dhe korrupsionin të publikuara nga Rrjeti Ballkanik i Gazetarisë Investigative në Shqipëri, BIRN Albania, me mbështetjen e USAID, për të mbështetur gazetarinë investigative në Shqipëri. Opinionet e autorit të shprehura në artikull jo domosdoshmërish reflektojnë ato të USAID apo të qeverisë së Shteteve të Bashkuara të Amerikës.