Prokuroria e Krimeve të Rënda kërkoi dënime maksimale për dy imamët dhe shtatë të pandehurit e tjerë, të cilët akuzohen se dërguan në Siri më shumë se 100 shqiptarë përgjatë viteve 2012-2014.
Prokuroria e Krimeve të Rënda kërkoi dënimin me 152 vjet burg në total për nëntë të pandehurit e akuzuar për rekrutimin e shqiptarëve në luftën e Sirisë dhe nxitje për kryerjen e akteve terroriste, të cilët gjykohen prej më shumë se një viti në Tiranë. Sipas Prokurorisë, ekzistojnë prova të shumta që dëshmojnë se të pandehurit, mes të cilëve edhe dy imamë, kanë bindur dhe dërguar në Siri më shumë se 70 shqiptarë për të luftuar përkrah grupeve terroriste si Al Nusra dhe ISIS.
Të martën, Prokuroria kërkoi dënimin me nga 20 vjet burg për dy imamët Genci Balla dhe Bujar Hysa, të cilët akuzohet se qëndronin në krye të rrjetit shqiptar të rekrutimit. Balla dhe Hysa i kanë mohuar më parë akuzat.
Njëzet vjet burg rrezikon të dënohet edhe Gerti Pashja, i cili u arrestua në Turqi dhe u deportua më pas për t’u përballur me drejtësinë shqiptare pranverën e vitit 2014. Sipas Prokurorisë së Krimeve të Rënda, ekzistojnë prova që tregojnë se Pashja ka udhëtuar disa herë me xhihadistë shqiptarë drejt Sirisë.
Prokuroria kërkoi dënimin me nga 15 vjet burg secili për pesë të pandehurit e tjerë; Orion Reçi, Astrit Tola, Verdi Morava, Fadil Muslimani dhe Edmond Balla, ndërsa për Zeqir Ymerin kërkoi 17 vjet burg. Të gjithë ata akuzohen gjithashtu për “nxitje dhe thirrje publike për kryerjen e akteve terroriste” dhe “rekrutim të personave me qëllim kryerjen e akteve terroriste”.
Nëntë të akuzuarit si anëtarë të një rrjeti rekrutuesish për xhihadistë u arrestuan në mars 2014, pasi Shqipëria adoptoi një legjislacion të ri për hetimin dhe dënimin e pjesmarrjes në konflikte të huaja. Hetimet 2-vjeçare kanë zbuluar se mbi 100 shqiptarë, mes të cilëve edhe gra e fëmijë shkuan në Siri përgjatë viteve 2012-2014.
Përgjatë këtyre viteve, 18 shqiptarë kanë humbur jetën në luftën e Sirisë, ndërkohë që fati i fëmijëve dhe grave mbetet ende i paqartë.