Qindra oficerë policie rrethuan gjykatën e Tiranës të mërkurën ndërsa një gjykatëse konsideroi të rregullta kërkesat e prokurorisë për masat e arrestit të protestuesve të së shtunës duke urdhëruar ndalimin për një pjesë të tyre dhe detyrimin e paraqitjes për të tjerët.
Qindra oficerë policie krijuan një seri me tre postoblloqe në çdo rrugë dhe rrugicë që të shpie në Gjykatën e Tiranës, duke shkaktuar telashe për banorët e zonës ndërkohë që qeveria u përball me kritika për përqasje të egër as sa disa e quajtën atë “shtet policor”.
Policia bllokoi një zonë të gjerë përreth gjykatës dhe ndaloi qytetarët duke i pyetur se ku po shkonin. Disa qytetarë nuk e morën lehtë situatën dhe debatuan me policinë mbi të drejtat e tyre për të lëvizur të lirë dhe pa pasur nevojë t’i japin llogari policisë se ku po shkonin.
Jashtë gjykatës, pak dhjetëra protestues u bashkuan me disa deputetë të opozitës duke kërkuar lirimin e protestuesve. “Arrestoni hajdutët në pushtet, jo qytetarët,” bërtiti njëri prej protestuesve përballë policisë.
Brenda gjykatës, disa deputetë të opozitës u përleshën me policinë, e cila u përpoq të ruante rendin.
Të 23 protestuesit e arrestuar të dielën dhe të akuzuar për shkatërrim prone gjatë një proteste të dhunshme kundër vendosjes së postobllokut të pagesës në autostradën që lidh Shqipërinë me Kosovën, u paraqitën në gjykatë mes akuzave për keqtrajtim dhe falsifikim dokumentesh.
Gjykata konsideroi të vlefshme kërkesat e prokurorisë pas pesë orësh debatesh, duke mbajtur të arrestuar një pjesë e duke liruar disa të tjerë, kryesisht për shkak të moshës dhe gjendjes shëndetësore.
Gjatë gjyqit, protestuesit akuzuan prokurorët se kishin falsifikuar dokumentet e arrestimeve të tyre. Ata pretenduan se ishin arrestuar nga policia në mes të natës në shtëpitë e tyre ndërsa dokumentet e prokurorisë tregojnë se ata janë arrestuar rreth orës 10 të mëngjesit të së dielës. Avokatët e të arestuarve pretenduan se kjo mospërputhje i bënte arrestimet të paligjshme.
Me ligj, vlerësimi i masës së sigurisë duhet të bëhet në vendin ku u kryen arrestimet, në këtë rast në Kukës. Gjithsesi, autoritetet e gjetën të vështirë të ruanin rendin në Kukës dhe transferuan të arrestuarit në Tiranë.
Partia Demokratike në opozitë i bëri thirrje shqiptarëve të tregonin solidaritet me të arrestuarit dhe bëri thirrje për një protestë të shtunën.
Djegia e pikës së vjeljes së taksës në Rrugën e Kombit gjithsesi nuk ishte protesta e vetme. Të mërkurën, në qytetin e Ballshit, dhjetëra punëtorë të rafinerisë së naftës u përleshën me rojet private të sigurisë, morën nën kontroll fabrikën dhe përzunë administratorin e një kompanie të panjohur private. Punëtorët e naftës kanë protestuar më herët duke kërkuar pagat e prapambetura dhe duke akuzuar qeverinë për korrupsion.
Rafineria e ndërtuar në kohën e komunizmit u privatizua në vitin 2008. Që nga ajo kohë, ajo ka falimentuar disa herë duke lënë qindramilionë euro taksa dhe detyrime të papaguara. Rasti i fundit ishte falimentimi i një kompanie ofshore dhjetorin e kaluar të quajtur IRTC, e cila ka dhjetëramilionë euro taksa të papaguara, pasi kishte nisur punën një vit më parë me bekimin e dy ministrave të qeverisë.