Zv. Ministri i Arsimit, Ervin Demo lajmëroi dorëheqjen nga posti në ministri pasi përgjatë dy javëve të fundit u vendos në qendër të akuzave për plagjiaturë në artikujt shkencorë të publikuar prej tij.
Zv. Ministri i Arsimit, Ervin Demo lajmëroi të premten përmes një statusi në Facebook se ka dhënë dorëheqjen nga posti si zëvendës ministër në Ministrinë e Arsimit, Rinisë dhe Sporteve.
Vendimi i Demos erdhi rreth dy javë pas një denoncimi të publikuar nga mjeku dhe kërkuesi shkencor Taulant Muka, i cili më 6 dhe 7 tetor publikoi krahasime të artikujve të publikuar nga zv. Ministri i Arsimit përballë librave dhe artikujve të studiuesve ndërkombëtarë, ku nënvizoheshin ngjasimet e shumta.
Në një artikull të vitit 2011, me titullin “Universitetet dhe transferimi i teknologjisë”, zv. ministri Demo shkruante “Nuk ka dyshim se aktivitetet e transferimit dhe komercializimit të teknologjisë në universitet po ndikojnë në ekonomitë lokale, rajonale dhe kombëtare”. Në një raport të vitit 2005, studiuesja Diana Palmintera shkruante: “Nuk ka dyshim se aktivitetet e transferimit dhe komercializimit të teknologjisë në universitet po ndikojnë në ekonomitë lokale, shtetërore dhe kombëtare”.
Deputetja Blerina Gjylameti renditet gjithashtu si bashkëautore e këtij artikulli, krah Ervin Demos.
Sipas Mukës, punimet e zv. Ministrit përveç plagjiaturës që përmbanin ishin publikuar në revista shkencore të dyshimta, duke hedhur poshtë titullin e tij si profesor i asociuar në 2012, që ka si kriter publikimin në revista me ndikim dhe të autorizuara.
“Duke kopjuar në Shqipëri mund të bëhesh profesor i asociuar, zv. Rektor dhe zv. Ministër i Arsimit.,” ironizoi studiuesi Muka, duke kërkuar dorëheqjen e zv. ministrit.
Pas bërjes publike të dy shembujve të plagjiaturës, akuzat morën vëmendje mediatike dhe u intensifikuan ditët e fundit edhe nga opozita që denoncoi heshtjen e qeverisë për atë që e quajti “skandal”.
Në deklaratën e dorëheqjes, zv. Ministri Demo i konsideroi akuzat si “baltë politike” dhe tha se kishte vendosur të hiqte dorë nga posti, duke “vënë interesat e kabinetit qeveritar mbi ato personale”.
“Çdo argumentim nga ana ime kundër baltosjes në pozicionin që jam sot, do të paragjykohej vetiu dhe do linte vend për keqinterpretime, nëse unë do të mbetesha në pozicionin tim,” shkroi zv. Ministri Demo në Facebook.
“Sot kam ofruar dorëheqjen si zëvendësministër dhe mbetem i përkushtuar në vijimin e përpjekjes sonë të përbashkët, si qytetarë e si veprimtarë të Partisë Socialiste,” shtoi ai.
Në një intervistë për Report TV më 10 tetor ministrja e Arsimit, Lindita Nikolla deklaroi se po kryente verifikime për artikujt objekt i akuzave për plagjiaturë të zv. Ministrit të saj dhe tha se nëse do të zbulohej se Demo kishte bërë plagjiaturë ai do të shkarkohej.
Demo u emërua si zv. Ministër i Arsimit në vitin 2017, ndërsa më parë mbante postin e Zv. Rektorit të Universitetit të Tiranës. Ai është gjithashtu anëtar i Këshillit Kombëtar Shkencor, ngarkuar me politikat e kërkimit shkencor dhe atyre të arsimit të lartë.
