Një mesazh në faqen e Facebookut të ish-kryeministrit maqedonas Nikola Gruevski, subjekt i një kërkimi në nivel kombëtar për mosparaqitje për kryerjen e dënimit të tij me dy vjet burg, thotë se ai është në Budapest duke kërkuar azil politik.
Pas një kërkimi të vazhdueshëm policor për Nikola Gruevskin në Maqedoni, një mesazh i postuar në faqen në Facebook të ish-kryeministrit të martën thotë se është në Budapest duke kërkuar azil politik nga autoritetet atje.
“Ditët e fundit unë kam marrë kërcënime të shumta për jetën time,” thoshte mesazhi.
“Aktualisht, jam në Budapest dhe kam kërkuar azil politik nga autoritetet hungareze. Unë do t’i qëndroj gjithmonë besnik kauzës maqedonase. Nuk do të tërhiqem kurrë,” vazhdonte mesazhi.
Policia maqedonase, e cila lëshoi një urdhër arresti për Gruevskin të hënën pasi ai nuk u paraqit në një burg për të vuajtur dënimin me dy vjet burg, tha se po kontrollon vërtetësinë e mesazhit ndërsa vazhdojnë kërkimet e tyre.
Megjithatë, kërkimi po kryhet vetëm në Maqedoni pasi policia ende nuk ka lëshuar një urdhër ndërkombëtar për arrestimin e Gruevskit.
Hungaria ishte një nga vendet që u përmend në spekulimet në rrjetet sociale si një vend i mundshëm në të cilin Gruevski mund të fshihej, pasi gjatë kohës së tij si kryeministër, ai u pa se kishte marrëdhënie sidomos të ngushta me homologun e tij hungarez Viktor Orban.
Herën e fundit që Orban vizitoi Maqedoninë ishte në shtator 2017 për t’u takuar me Gruevskin, i cili ishte kryetari i partisë opozitare VMRO DPMNE në atë kohë, në fillim të një fushate zgjedhore lokale ku partia e Gruevskit humbi.
Sipas ligjit shumë të kritikuar të azilit në Hungari, një kërkesë për azil duhet të dorëzohet ekskluzivisht në zonat e tranzitit kufitar, ku aplikantët ndalohen derisa të merret një vendim përfundimtar për kërkesën e tyre.
Gruevski u dënua me dy vjet burg në çështjen gjyqësore të koduar me emrin “Tanku”, ku u gjet fajtor për blerjen e paligjshme të një Mercedesi prej 580,000 eurosh në vitin 2012 nga ish-ministrja e brendshme Gordana Jankuloska, të cilin ai planifikonte të përdorte për të qëllimet e veta.
Gjykata e Apelit konfirmoi dënimin e tij me dy vjet burg më 5 tetor.
Gruevski ka insistuar që kjo dhe raste të tjera gjyqësore kundër tij janë një sajesë politike nga qeveria e re e udhëhequr nga Bashkimi Social Demokrat, SDSM.
Ai shërbeu si kryeministër i Maqedonisë nga viti 2006 deri në vitin 2016. Partia e tij e djathtë VMRO DPMNE u rrëzua nga pushteti në vitin 2017 pas një krize të gjatë politike në të cilën ai dhe bashkëpunëtorët e tij të ngushtë u akuzuan për imponim të sundimit autoritar dhe përfshirje në korrupsion.