Autoriteti shëndetësor i njohur si Komiteti Teknik i Ekspertëve, urdhëroi ndalimin e mbledhjeve me mbi 10 vetë. Kryetari i Kuvendit Gramoz Ruçi thotë se nga urdhëresa e ekspertëve nuk arrin të kuptojë nëse në ndalim përfshihen edhe seancat plenare të Kuvendit të Shqipërisë.
Kuvendi i Shqipërisë njoftoi se seanca plenare e ditës së enjte nuk do të zhvillohet për shkak se kryetari i Kuvendit Gramoz Ruçi nuk e ka të qartë nëse urdhri i Komitetit Teknik të Ekspertëve për të ndaluar tubimet politike, dasmat e funeralet, përfshin apo jo edhe seancat plenare të Kuvendit.
Në një njoftim për shtyp, kuvendi bëri të ditur se Ruçi i ka dërguar një kërkesë për sqarim ministres së Shëndetësisë Ogerta Manastirliu dhe Komitetit Teknik.
“Kryetari i Kuvendit, z. Gramoz Ruçi, i është drejtuar Komitetit Teknik të Ekspertëve dhe Ministres së Shëndetësisë dhe Mbrojtjes Sociale, znj. Ogerta Manastirliu, për të bërë një interpretim lidhur me vazhdimin e seancave plenare të Kuvendit,” thuhet në njoftimin e publikuar në faqen e internetit të kuvendit.
Që kur Shqipëria ndërmorri masa kufizuese të aktivitetit ekonomik e shoqëror në mars të këtij viti në përpjekje për të penguar përhapjen e virusit që ka prekur deri më sot gati 30 mijë shqiptarë duke vrarë mbi 600 prej tyre, qeveria e Kryeministrit Edi Rama është kritikuar shpesh për paqartësi në urdhrat dhe kufizimet e hartuara, të cilat janë ndryshuar me dhjetëra herë, duke krijuar pasiguri për qytetarët e bizneset mbi mënyrën se si duhet të veprojnë. Por letra e Ruçit për Komitetin dhe ministren sugjeron se jo vetëm qytetarët janë të hutuar nga teknika e hartimit të rregullave dhe urdhëresave nga komiteti teknik.
Kuvendi i Shqipërisë gjendet aktualisht në fund të mandatit të vet aktual dhe disa funksione të tij duket se janë të domosdoshme, të tilla si miratimi i dekretligjeve që mund të nevojiten të ndërmerren nga qeveria me urgjencë për të përballuar emergjencën mjekësore të pandemisë. Kuvendi duket se nuk mund ta kryejë këtë funksion nëse Komiteti Teknik i Ekspertëve nuk i jep leje që të mblidhet.
