Lajm26 Jan 2017

Ambasada e SHBA revokon vizat për disa gjyqtarë dhe prokurorë shqiptarë

Ambasada e SHBA në Tiranë sqaroi se revokimi i vizave vjen në prag të procesit të vetingut dhe si përgjigje ndaj abuzimit flagrant me vizën nga një prokuror i nivelit të lartë dhe bashkëshortja e tij.

Autor: BIRN BIRN Tiranë
Printo

Ambasada e Shteteve të Bashkuara në Tiranë.

Ambasada e Shteteve të Bashkuara në Tiranë.

Ambasada e Shteteve të Bashkuara në Tiranë njoftoi të enjten se ka revokuar vizat e disa gjyqtarëve dhe prokurorëve shqiptarë, që sipas saj nuk kualifikohen për këto viza. Përmes një njoftimi për shtyp, ambasada e SHBA deklaroi se ky veprim është ndërmarrë përpara procesit të pritshëm të vetingut dhe në përgjigje të një rasti, që e cilësoi “abuzim flagrant me vizën zyrtare të një prokurori të nivelit të lartë dhe bashkëshortes së tij”.

“Ambasada e Shteteve të Bashkuara e ka ndërmarrë këtë veprim përpara procesit të pritshëm të vetingut, i cili do të vlerësojë lidhjet e zyrtarëve të caktuar me korrupsionin, si dhe në përgjigje të një rasti që përfshinte abuzim flagrant të një vize zyrtare nga një prokuror i nivelit të lartë dhe bashkëshortja e tij, gjë që çoi në revokimin e vizave të tyre,” thuhet në njoftim.

Selia diplomatike rezervoi të drejtën të mos bënte publike të dhëna konfidenciale të rasteve të veçanta, por theksoi se ambasada e Shteteve të Bashkuara i merr seriozisht akuzat për korrupsion. Ajo paralajmëroi se do të vazhdojë t’i shqyrtojë vizat dhe aplikimet për vizë të zyrtarëve të drejtësisë me vëmendje të shtuar.

“Departamenti i Shtetit ka një autoritet të gjerë për të mohuar dhe revokuar viza bazuar në informacione që tregojnë se zotëruesi i vizës mund të jetë i papranueshëm në Shtetet e Bashkuara dhe Departamenti i Shtetit do të vazhdojë ta përdorë këtë autoritet për të çuar përpara përpjekjet kundër korrupsionit në Shqipëri,” mbyllet njoftimi i ambasadës së SHBA në Tiranë.