Protesta e banorëve të Unazës së Re të cilët preken nga zgjerimi i rrugës, para godinës së Kuvendit, u shoqërua me përplasje me policinë, e cila njoftoi se 6 punonjës të saj u plagosën. Ndërkohë disa protestues u shoqëruan në komisariat. Protestuesit akuzojnë qeverinë se po u prish pa dëmshpërblim shtëpitë.
Banorë të zonës së Unazës së Re u përplasën me policinë gjatë një proteste mëngjesin e të ejtes përpara parlamentit. Banorët, të cilët kërkojnë të dëmshpërblehen për prishjen e ndërtesave nga zgjerimi i rrugës hodhën tymuese e shashka, ndërsa policia raportoi se 6 efektivë të saj u plagosën.
Protestuesit, të cilëve iu bashkuan edhe disa deputetë të opozitës, akuzuan qeverinë për korrupsion. Ata kërkojnë të dëmshpërblehen me vlerën e tregut për godinat që u prishen pavarësisht statusit të legalizimit të tyre, ndërsa akuzojnë autoritete për trajtim të diferencuar pasi një pjesë janë legalizuar e të tjerë jo. Para kuvendit protestuesit kërkuan të priten prej drejtuesve të qeverisë dhe nga kryetari i Bashkisë së Tiranës.
Policia njoftoi ndërkohë shoqërimin e disa protestuesve pas përplasjeve fizike. Policia njoftoi se “Gjatë protestës që përshkallëzoi në akte dhune ndaj forcave të rendit, përballë godinës së sallave plenare të Kuvendit të Shqipërisë janë plagosur 6 efektivë të Policisë së Shtetit”. Ajo u bëri thirrje protestuesve për tu disatancuar nga aktet e dhunës.
Opozita e cila i është bashkuar protestës, po ashtu ka denoncuar tenderin për disa segmente të reja të unazës si korruptiv. Kryetari i PD-së Lulzim Basha është shprehur se veprimet e qeverisë në zonë ishin “spastrim etnik”. “Kanë bërë një projekt dhe duan të prishin 370 banesa. Projekti është me tender korruptiv dhe nuk ka pasur garë. 40 milionë euro për 2 km rrugë. I pyeti njeri banorët dhe inxhinierët? Askush nuk u konsultua. Ligji është shkelur nga të dyja këmbët nga vetë shteti dhe qeveria”, tha Basha në një takim me studentë.
Protesta u zhvillua gjatë kohës që në kuvend po lexoheshin diskutimet për buxhetin e vitit 2019.
Ndërsa policia përplasej me banorët, kryeministri Edi Rama i quajti ata zaptues. Ai po ashtu përmendi emra që tha se ishin të protestuesve e që sipas tij kishin tashmë të legalizuara godina pa leje në zona të ndryshme të kryeqytetit.
Duke përmendur rritjet e pagave të parashikuara në buxhet, Rama tha se nuk mund ta ndryshonin këtë për të dëmshpërblyer 100 për qind protestues, të cilët ndërkohë kishin përfituar nga legalizimet dhe kishin disa ndërtime pa leje. “(Ramazani) Proteston sepse nuk pranon që objekti i 5 pa leje t'i prishet për interes të qytetit ku ai është bërë zotërues i 4 pronave të tjera”, tha ai.
Zgjerimi i rrugës dhe prishjet u njoftuan në fillim të këtij muaji nga Drejtuesit e Autoritetit Rrugor Shqiptar, Inspektoratit Kombëtar të Mbrojtjes së Territorit, Hipotekës, ALUIZNI-t dhe Bashkisë Tiranë. Qeveria pretendon se për momentin ishtë në fazë verifikimi dhe matjesh.
Ata thanë se ndërtesat që prekeshin ishin rreth 317 në të gjitha segmentet e Unazës së madhe dhe binin në disa kategori. Shumica rreth 163 ishin të palegalizuara dhe procesi do u ndërpritej, 123 ishin me vërtetim pronësie, 22 ishin skualifikuar, ndërsa disa kishin statuse të ndryshme ose ende të papërcaktuara.
Banorët, një pjesë e të cilëve thonë se i kanë godinat prej kohësh në proces legalizimi e madje se kanë paguar tarifat e kërkuara prej këtij procesit, janë tashmë prej javësh në protestë. Ata kanë bllokuar disa herë rrugën, ndërsa pretendojnë se po trajtohen në mënyrë të padrejtë.
Autoritetet shtetërore premtuan fillimisht dëmshpërblim për ata që kishin dokumente pronësie dhe një vit qira për pjesën tjetër që humbiste shtëpitë pa të drejtë dëmshpërblimi për shkak se ndërtesat ishin të palegalizuara. Pas protestave Bashkia Tiranë premtoi tre vite qira për ata që nuk përfitonin nga dëmshpërblimet.
Kjo nuk është hera e parë që qeveria paralajmëron apo prish ndërtime që bien në vijën ku kalojnë punë publike. Një vit më parë dhjetra banorë në Shkozë u shpronësuan dhe shtëpitë e tyre u prishën pavarësisht se një pjesë pretendonin se kishin dokumente për to. Në Shkurt 2016 projekti preku komunitetin rom në Selitë, të cilët po ashtu u shpronësuan mes protestave dhe me ndërhyrjen e policisë. E ngjashme është historia në Bulevardin e Ri të Tiranës dhe një sërë projektesh infrastrukture në mbarë vendin, ndërtimi i të cilave ka kaluar përmes prishjes së banesave, ndërsa banorët kanë kundërshtuar dëmshpërblimet bazuar në çmimet e referencës, mosmarrjen në konsideratë të procesit të legalizimit dhe ndërhyrjen arbitrare në një kohë të shkurtër.