Lajm22 Nov 2017

Zgjerohet dosja “Tahiri”, tre urdhër-arreste për ish-drejtues të policisë

Një muaj pas nisjes së procedimit penal për ish-ministrin Saimir Tahiri, Prokuroria e Krimeve të Rënda urdhëroi arrestimin e 3 ish-drejtuesve të policisë së Vlorës, të cilët akuzohen se bashkëpunuan me Habilajt në trafikun e drogës.

Autor: Elton Qyno BIRN Tiranë
Printo

Kushërinjtë Moisi Habilaj (majtas) dhe Saimir Tahiri | Foto nga : LSA

Një muaj pas nisjes së procedimit penal për ish-ministrin e Brendshëm, Saimir Tahiri, Prokuroria e Krimeve të Rënda firmosi tre urdhër-arreste për ish-drejtues të policisë së Vlorës, të cilët akuzohen se janë implikuar në çështjen “Habilaj”.

Burime zyrtare nga Prokuroria e Krimeve të Rënda i thanë BIRN se urdhër-arrestet përfshijnë ish-drejtorin e policisë së Vlorës, Jaeld Çela dhe dy vartës të tij, të cilët akuzohen për veprën penale të trafikut të narkotikëve në bashkëpunim.

Sipas Prokurorisë së Krimeve të Rënda, urdhër-arrestet i janë dërguar për ekzekutim Policisë së Shtetit. Ish-drejtuesit e policisë akuzohen se kanë bashkëpunuar me vëllezërit Habilaj, duke i favorizuar ata në kultivimin dhe trafikimin e lëndëve narkotike.

Moisi dhe Florian Habilaj akuzohen për trafikimin e rreth 3.5 ton kanabis në drejtim të Italisë përgjatë viteve 2013-2017, kohë kur antimafia italiane i mbante në përgjim. Në këto përgjime, dy vëllezërit por edhe bashkëpunëtorët e tyre në këtë rrjet të trafikimit kanë përmendur pagesa të bëra në adresë të ish-ministrit të Brendshëm, Saimir Tahiri si dhe mbylljen e njërit sy nga strukturat e policisë lokale.

Më 19 tetor, Prokuroria e Krimeve të Rënda kërkoi autorizimin e Kuvendit të Shqipërisë për arrestimin e Tahirit, por Partia Socialiste e rrëzoi këtë kërkesë duke e cilësuar të pabazuar në prova.

Situata juridike e Tahirit u rëndua pas 1 nëntorit, kur një partullë policie ndaloi 25-vjeçarin Orest Sota në afërsi të fshatit Balldren në Elbasan, ndërsa gjatë kontrollit të makinës së tij u gjetën 863 mijë euro dhe dy patenta për drejtim mjeti lundrues të Tahirit.

Avokatët e Sotës pretenduan se paratë i përkisnin babait të tij, biznesmenit Lefter Sota, por Prokuroria e Krimeve të Rënda deklaroi se kishte dyshime se shuma prej 863 mijë euro i përkiste ish-ministrit Tahiri dhe kishte si burim aktivitetet kriminale.