Lajm25 Oct 2019

KLP i hap rrugën ngritjes së Prokurorisë së Posaçme me 8 anëtarë

Këshilli i Lartë i Prokurorisë miratoi një propozim që synon emërimin e tetë prokurorëve dhe hapjen e garës për drejtuesin e SPAK brenda nëntorit, por ngritja e plotë e strukturës antikorrupsion- që sipas Kushtetutës duhet të ketë të paktën 10 prokurorë, mbetet ende e paqartë.

Autor: Aleksandra Bogdani BIRN Tiranë
Printo

Kryetari i KLP, Gent Ibrahimi pas intervistave me katër kandidatët e parë të SPAK-ut. Foto: Malton Dibra/LSA.

Këshilli i Lartë i Prokurorisë i hapi rrugën të premten ngritjes së Prokurorisë së Posaçme kundër Korrupsionit dhe Krimit të Organizuar, SPAK edhe me numrin minimal prej 8 anëtarësh -një numër ky më i vogël se dyshemeja e përcaktuar në Kushtetutë prej të paktën dhjetë prokurorësh.

Sipas një njoftimi për shtyp, anëtarët e Këshillit votuan unanimisht në favor të një propozimi që parashikon emërimin e tetë prokurorëve të kualifikuar me vendim të formës së prerë të vetingut brenda 30 ditëve si dhe hapjen e garës për drejtuesin e SPAK-ut.

Neni 148/dh i Kushtetutës përcakton që Prokuroria e Posaçme përbëhet nga të paktën 10 prokurorë, të cilët emërohen nga Këshilli i Lartë i Prokurorisë për nëntë vjet, pa të drejtë riemërimi. Megjithatë, kryetari i KLP-së, Gent Ibrahimi deklaroi për mediat se vendimi nuk bie ndesh me Kushtetutën, pasi lidhet me emërimin e prokurorëve dhe jo me ngritjen e SPAK-ut.

“Ne sot arrijmë në përfundimin se ngritja me 8 apo me 10 anëtarë nuk na përket ne. Ne po emërojmë prokurorët për SPAK, ne nuk marrim vendimin për krijimin e SPAK. Ne nuk e shkelim Kushtetutën për ngritjen e SPAK me 8 anëtarë,” tha Ibrahimi për mediat.

Këshilli i Lartë i Prokurorisë e hapi garën për ngritjen e SPAK-ut në fillim të janarit, megjithatë dhjetë muaj më vonë është ende e paqartë se kur struktura që shpresohet se do të luftojë korrupsionin e lartë dhe krimin e organizuar do të jetë plotësisht funksionale.

Këshilli i Lartë i Prokurorisë kualifikoi 15 kandidatë nga 27 që iu përgjigjën fillimisht thirrjes, por vetëm 8 prej tyre ia kanë dalë të kenë një vendim pozitiv të formës së prerë nga institucionet e vetingut.

Katër kandidatët Anton Martini, Elisabeta Imeraj, Doloreza Musabelliu dhe Anita Jella nuk janë përballur ende me vetingun, ndërkohë që prokurorja Manjola Kajana është apeluar në Kolegj dhe Ndini Tavani u shkarkua nga Komisioni i Pavarur i Kualifikimit. Besnik Muçi, i cili ishte i zgjedhuri i 15-të i KLP-së është dekretuar tashmë si anëtar i Gjykatës Kushtetuese, ndonëse vazhdon të përballet me një kërkesë për shkarkim në Kolegj.

Konstituimi i plotë i Prokurorisë së Posaçme kërkon që të paktën dy kandidatë të tjerë të kalojnë procesin e vetingut si dhe KLP të ketë kryer zgjedhjen e drejtuesit të SPAK. Sipas Kushtetutës, drejtuesi i Prokurorisë së Posaçme zgjidhet me votat e shumicës së anëtarëve të KLP-së për një mandat 3-vjeçar pa të drejtë rizgjedhjeje.

 

Prokurorët gati për SPAK

1-Altin Dumani

2-Arben Kraja

3-Klodian Braho

4-Enkeleda Millonaj

5- Edvin Kondili

6- Ened Nakuçi

7-Elida Kaçkini

8-Behar Dibra

Ende pa veting

Anton Martini

Elisabeta Imeraj

Doloreza Musabelliu

Anita Jella

E apeluar

Manjola Kajana

I shkarkuar

Ndini Tavani