Lirimi me garanci pasurore i Rakip Arapajt përmes një vendimi të Gjykatës së Vlorës dhe transmetimi i lajmit nga media nxiti Inspektoriatin e Këshillit të Lartë të Drejtësisë të niste verifikimet mbi ligjshmërinë e rastit.
Inspektoriati i Këshillit të Lartë të Drejtësisë ka nisur verifikimet për gjyqtarin e Gjykatës së Vlorës, Arqile Basho, pas raportimit në media që evidentoi lirimin me garanci pasurore të një personi të arrestuar për mbajtjen e rreth 5 tonëve lëndë narkotike në fshatin Llakatund të Vlorës.
Sipas njoftimit për shtyp të shpërndarë nga KLD të enjten, verifikimi i vendimit të gjyqtarit nisi pas shqyrtimit të të dhënave të transmetuara në media dhe kuadrit ligjor në fuqi.
Më 10 tetor, Top Channel raportoi mbi vendimin e gjykatës së Vlorës për lirimin nga masa e arrestit me burg të 58-vjeçarit Rakip Arapajt, rreth tre muaj pasi policia e kishte arrestuar si të dyshuar për kultivimin dhe magazinimin e 5 tonëve lëndë narkotike.
Por ndonëse prokuroria e akuzonte Arapajn për këtë sasi droge, gjyqtari Arqile Basho vendosi ta lirojë të dyshuarin në këmbimin e një garancie pasurore prej 1 milionë lekësh, duke pranuar pretendimet se ai nuk kishte asnjë lidhje me sasinë e drogës së gjetur në shtëpinë e vëllait të tij të vdekur, ku nuk hynte prej vitesh.
Sipas Prokurorisë së Vlorës, Arapaj banonte rreth 7 metra larg shtëpisë ku u gjet lënda narkotike, ndërtesë kjo që ka një oborr dhe portë të përbashkët me shtëpinë e të dyshuarit.
“Policia gjyqësore i ka kërkuar shtetasit Rakip Arapaj të hapte banesën e mbyllur, shtetasi ka deklaruar se banesa nuk është në pronësinë e tij, por të vëllait që ka vdekur dhe ai që nga vdekja e vëllait nuk ka hyrë në banesë,” citoi Top Channel vendimin e lirimit me garanci pasurore.
Sipas njoftimit të KLD, Inspektoriati do të kryejë verifikimin e vendimit gjyqësor sa i përket ligjshmërisë së tij.
“Inspektorati i KLD-së ka filluar verifikimit për mbledhjen e të gjitha provave të nevojshme që hedhin dritë mbi faktet e ekspozuara në ankesën publike, duke i kërkuar Gjykatës së Rrethit Gjyqësor Vlorë paraqitjen e të gjitha vendimeve dhe procesverbaleve mbi procesin gjyqësor të zhvilluar ndaj të pandehurit R.A lidhur me caktimin e masës së sigurimit “arrest në burg” dhe lidhur me lirimin e tij nga paraburgimi,” thuhet në njoftimin për shtyp.