Ambasada e Shteteve të Bashkuara dhe Delegacioni i BE mirëpritën opinionin e Komisionit të Venecias dhe i bënë thirrje Gjykatës Kushtetuese ta marrë atë në konsideratë, për t’i hapur rrugën procesit të vetingut për gjyqtarët dhe prokurorët.
Ambasada e Shteteve të Bashkuara dhe delegacioni i Bashkimit Europian në Tiranë mirëpritën opinionin pozitiv të Komisionit të Venecias për ligjin e vetingut dhe bënë thirrje që kjo përgjigje të merret në konsideratë në mënyrën e duhur.
Në dy deklarata të veçanta për mediat, ambasada e SHBA dhe ajo e BE-së ndanë qëndrimin e përbashkët se Gjykata Kushtetuese duhet të bazohet tek ky opinion për t’i dhënë një zgjidhje të shpejtë shqyrtimit të ligjit “për rivlerësimin e gjyqtarëve dhe prokurorëve”.
“Vetingu i gjykatësve do të jetë një hap kuptimplotë drejt eliminimit të korrupsionit të thellë gjyqësor në Shqipëri dhe opinioni i Komisionit të Venecias duhet t’i japë fund çdo shqetësimi legjitim lidhur me ligjin,” thuhet në deklaratën e ambasadës së SHBA-së.
Ndërsa është në pritje të vendimit të Gjykatës Kushtetuese, ambasada amerikane në Tiranë u shpreh se ka besim tek vendimi i kësaj gjykate.
“Shtetet e Bashkuara kanë besim se Gjykata Kushtetuese do të riparojë besimin e publikut tek sistemi gjyqësor që është dëmtuar nga gjykatës dhe prokurorë të korruptuar,” shtohet më tej.
Njësoj si ambasada e SHBA, edhe delegacioni i BE-së në Tiranë, që foli në emër të ambasadave të vendeve anëtare bëri thirrje për një vendim të shpejtë të Gjykatës Kushtetuese.
“Ne nxisim gjithë të gjitha forcat politike, të gjitha institucionet shtetërore përkatëse dhe të gjitha organet gjyqësore në Shqipëri që të nisin pa vonesa të mëtejshme zbatimin e reformës së drejtësisë. Progresi në këtë fushë është thelbësor në mënyrë që procesi i anëtarësimit në BE të ecë përpara,” shkruhet në deklaratën e BE.
Komisioni i Venecias miratoi më 10 dhjetor opinionin për ligjin e vetingut, duke e cilësuar atë në përputhje me Kushtetutën e Shqipërisë dhe Konventën Ndërkombëtare të të Drejtave të Njeriut. Opinioni u përshëndet edhe nga aktorët politikë në Shqipëri, ndonëse nuk munguan leximet e zakonshme mes rreshtave.
Partia Demokratike, e cila është edhe autore e padisë në Gjykatën Kushtetuese të ligjit të vetingut deklaroi se Komisioni i Venecias i ka dhënë të drejtë shqetësimeve të saj, përmes konstatimit se “organet nën varësinë e kryeministrit duhet të jenë domosdoshmërisht nën mbikqyrjen e Komisionit të Pavarur të Vetingut”.
“Ne nxisim Gjykatën Kushtetuese që të përfundojë në një kohë të shkurtër shqyrtimin e kushtetutshmërisë së ligjit të vettingut, sipas të gjithë çështjeve të ngritura në kërkesën e Partisë Demokratike,” tha PD.
Ky reagim është ironizuar më pas nga kryeministri Edi Rama, i cili shkroi në një postim në Facebook se “PD pretendon se ka një përkthim ekskluziv të Venecias”.
Pas dritës jeshile që Komisioni i Venecias i dha ligjit të vetingut, e gjithë vëmendja është përqendruar në Gjykatën Kushtetuese, e cila pritet të japë edhe përgjigjen përfundimtare për ligjin kyç të paketës së reformës në drejtësi.
