Gjashtë shqiptarë muslimanë, siç pretendohet ekstremistë, u dënuan me burgim të përjetshëm për terrorizëm në lidhje me vrasjen e pesë të rinjve maqedonas në Shkup – rast ky i cili ngriti tensionet etnike në vend.
Alil Demiri, Afrim Ismailovic, Agim Ismailovic, Fejzi Aziri, Haki Aziri dhe Sami Ljuta u gjetën fajtor të hënën për vrasjen e pesë personave të etnisë maqedonase në Pashkët Ortodokse të vitit 2012 dhe u është dhënë dënimi më i gjatë i mundshëm për vepra të terrorizmit, burgim i përjetshëm.
Gjykata është shprehur se vrasja ishte planifikuar dhe kryer në një “mënyrë vicioze”.
Personi i shtatë, Rami Sejdi, i cili fillimisht ishte akuzuar se kishte ndihmuar grupin të kryejë vrasjet u lirua nga akuzat. Alil Demiri dhe Afrim Ismailovic u dënuan në mungesë sepse ata janë në burg në Kosovë, në vuajtje të dënimit për armëmbajtje të jashtëligjshme.
Vrasjet nxitën protesta të dhunshme në vitin 2012 dhe policia të hënën në mënyrë të dukshme ka qenë e pranishme rreth gjykatës dhe në qendër të Shkupit nën frikën për një shpërthim tjetër të trazirave ndëretnike pas kalimit të aktgjykimit.
Gjykatësi Ivica Stefanovski bëri thirrje që vendimi i gjykatës të pranohet me qetësi.
“Përkundër etnisë së ndryshme të të pandehurve dhe viktimave, aktgjykimi nuk duhet të ndikojë në marrëdhëniet ndër-njerëzore,” u shpreh Stefanovski.
Prokurorja Gordana Geskovska i tha gjykatës në fillim të këtij muaji se vrasja ishte një akt i terrorit i kryer me qëllim të provokimit të tensioneve etnike ndërmjet shumicës maqedonase dhe minoritetit më të madh në vend, shqiptarëve.
Mirëpo avokati mbrojtës Naser Raufi tha në argumentin e tij përmbyllës se të shtatë të akuzuarit nuk kanë pasur asgjë të bëjnë me vrasjen, duke hedhur poshtë pretendimet e prokurorisë se të pandehurit ishin terroristë dhe duke ngritur dyshimin për materialet forenzike të paraqitura nga prokuroria.
Sipas akuzave, dy të arratisurit, Alil Demiri dhe Afrim Ismailovic, vranë pse maqedonasit me pushkë automatike në afërsi të Shkupit gjatë Pashkëve Ortodokse në vitin 2012, derisa pesë personat tjerë kanë ofruar mbështetje logjistike.
Trupat e Filip Slavkovski, Aleksandar Nakjevski, Cvetanco Acevski dhe Kire Trickovski, që të gjithë në moshën në mes 18 dhe 20, u zbuluan më 12 prill të vitit 2012. Trupat e tyre ishin rreshtuar dhe duket të kenë qenë ekzekutuar.
Trupi i 45-vjeçarit Borce Stevkovski ishte gjetur pak më larg nga të tjerët në një distancë të shkurtër.
Lajmi për vrasjen ngriti tensionet etnike, pasi që grupet etnike maqedonase nisën protestat, ku disa prej të cilave u kthyen në të dhunshme, duke fajësuar për vrasje anëtarët e minoritetit më të madh në Maqedoni, shqiptarët.
Gjatë në vizite kohëve të fundit në Maqedoni, Komisionerja e Lartë e OSBE-së për Minoritetet, Astrid Thors, tha se ajo ishte e brengosur dhe kishte frikë se gjykimi do të mund të ndizte tensione të mëtejme.
“Do t’u rekomandojmë udhëheqësve politikë të bëjnë thirrje të përbashkët për përmbajtje dhe për qetësi në mënyrë që të shmanget prishja e qetësisë,” tha Thors.
Mirëpo në ditët para aktgjykimit, asnjë udhëheqës i lartë politik nuk bëri thirrje për qetësi.
Në vitin 2001, Maqedonia përjetoi një konflikt të shkurtër të armatosur ndërmjet kryengritësve të etnitetit shqiptar dhe forcave të sigurisë. Konflikti përfundoi në të njëjtin vit me nënshkrimin e marrëveshjes së paqes e cila rriti të drejtat e shqiptarëve.
Shqiptarët përbëjnë çerekun e popullatës prej 2.1 milion të këtij vendi.
