Edhe pse shumica e shqiptarëve e mirëpret vizitën e Papës Françesk, disa prej tyre shprehin shqetësime për shpenzimet e mëdha të qeverisë për mikëpritjen e tij.
Papa Françesk pritet të mbajë një vizitë njëditore në Tiranë më 21 shtator – vizita e parë e Atit të Shenjtë në një vend Europian.
Vizita e papës pritet të tërheqë vëmendjen e medias botërore mbi Shqipërinë, dhe autoritetet shqiptare po shpenzojnë më shumë se një milionë euro për të rehabilituar sheshin Nënë Tereza në Tiranë, ku papa pritet të mbajë recitimin e Angelus.
Fonde të tjera shtesë për përgatitjen e sheshit janë akorduar edhe nga bashkia e Tiranës.
“Projekti që po realizohet ka marrë miratimin e Këshillit Kombëtar të Restaurimit,” tha ministrja e kulturës Mirela Kumbaro, gjatë inspektimit të punimeve më 16 gusht.
“Një milionë dollarë është fondi për restaurimin e sheshit dhe muzeut, ndërsa rehabilitimi i shatërvanit do të realizohet me fondet e bashkisë,” shtoi ajo.
Vizita e papa Françeskut në Tiranë është vizita e dytë e një pape në Shqipëri, pas vizitës së papa Gjon Palit II më 25 prill, 1993.
Për gati gjysmë shekulli, nën regjimin brutal të diktatorit stalinist Enver Hoxha, Shqipëria qe vendi më i izoluar në Europë, i krahasueshëm sot me Korenë e Veriut.
Më 1967, Hoxha e deklaroi Shqipërinë vendi i parë ateist në botë, duke nisur një fushatë të re përndjekjeje kundër të gjitha religjioneve dhe në veçanti kundër Kishës Katolike, tradicionalisht e fuqishme në veri të vendit.
Sot, shumica e shqiptarëve janë muslimanë, ndërsa kishat ortodokse dhe katolike kanë ndjekës të shumtë.
Merita Shehu, mësuese e ciklit të ulët në Tiranë, mendon se kjo vizitë meriton të vlerësohet, pasi Shqipëria njihet prej kohësh për tolerancën fetare. Liza Kaceli, një qytetare nga Tirana, vlerëson faktin që papa ka zgjedhur pikërisht Shqipërinë si vëndin e parë që do të vizitojë.
“Vendi ynë ishte i përzgjedhuri i parë nga vendet europiane dhe se kjo ka një domethënie të madhe për ne,” thotë ajo.
Jo të gjithë shqiptarët e vlerësojnë njëlloj vizitën e papës në Tiranë, madje disa prej tyre ankohen për shpenzimet e qeverisë në prag të vizitës së tij.
“Nuk më intereson. Për mua është njësoj,” that një studente në fakultetin e gjuhëve të huaja në Universitetin e Tiranës.
“Ndonjë lek të na sjelli nuk do ishte keq, si hallexhinj që jemi,”- shtoi ajo.
“Mikëpritja është virtyti që shqiptarin e ka shoqëruar gjatë gjithë jetës së tij, ndaj nuk diskutohet që nuk do të mungojë as tani”,- shprehet Adnan Kallushi, një tregar nga Tirana.
Por ai shton se për një vend me zhvillim ekonomik që lë për të dëshiruar, shpenzimet e kryera nga ana e qeverisë janë paksa të tepërta.
“Me pothuaj 160 milionë lekë të harxhuara për të rregulluar sheshin “Nënë Tereza”, qeveria mund të mbushte shumë boshllëqe të tjera më urgjente,” shtoi ai.
